រាជធានីភ្នំពេញ ៖ នារីម្នាក់ជា និស្សិតឆ្នាំទី៣ នៅសាកលវិទ្យាល័យ បញ្ញាសាស្ត្រ ទើបនឹងចេញពីរៀន ជិតដល់ផ្ទះហើយ ត្រូវជនប្រដាប់អាវុធ ភ្ជង់ប្លន់យកម៉ូតូ ស្គូពីមួយគ្រឿង ទៅបាត់ដោយសុវត្ថិភាព ។

ហេតុការណ៍បាញ់ប្លន់ យកម៉ូតូនេះ កើតឡើងកាល ពីវេលាម៉ោង៩ និង១០នាទីយប់ ថ្ងៃទី០១ តុលា នៅតាមផ្លូវបេតុង ស្ថិតក្នុង ភូមិរោងចក្រ សង្កាត់ភ្នំពេញថ្មី ខណ្ឌសែនសុខ ។

នារីជាម្ចាស់ម៉ូតូមានឈ្មោះ អៀង សុខនិមល អាយុ២៣ឆ្នាំ ជានិស្សិតឆ្នាំទី៣ នៅសាកលវិទ្យាល័យ បញ្ញាសាស្ត្រ ស្នាក់នៅ ភូមិកើតហេតុ បានឲ្យដឹងថា មុនពេលកើតហេតុ នាងជិះម៉ូតូស្គូពី ពណ៌គ្រាប់អំពិល ពាក់ស្លាកលេខ ភ្នំពេញ 1BD-5853 ទើបនឹងចេញ ពីសាលារៀន ធ្វើដំណើរ ត្រឡប់ទៅផ្ទះវិញ ដោយបើក ពីត្បូងទៅជើង ពេលជិះជិតដល់ផ្ទះ នៅសល់ប្រមាណ ១០០ម៉ែត្រ គឺផ្លូវកែងមួយទៀត ដល់ផ្ទះហើយ ស្រាប់តែមាន ជនសង្ស័យ២នាក់ ជិះម៉ូតូហុងដាឌ្រីម ជិះតាមកៀរផ្តួលម៉ូតូ ហើយដកកាំភ្លើងភ្ជង់ គំរាមប្លន់យកម៉ូតូ នាងព្រមប្រគល់ ម៉ូតូឲ្យហើយ ស្រាប់តែមាន ប្រជាពលរដ្ឋបើកទ្វារផ្ទះ ចេញមកបម្រុង ជួយអន្តរាគមន៍ ក៏ត្រូវជនប្រដាប់អាវុធ ដកកាំភ្លើងភ្ជង់ ហើយបាញ់ឡើងលើ គំរាមមួយគ្រាប់ រួចលើកម៉ូតូជិះចេញ ទៅបាត់ស្រមោល ។

ក្រោយពេលកើតហេតុ លោកអធិការខណ្ឌសែនសុខ បានដឹកនាំកម្លាំង ចុះទៅដល់ កន្លែងកើតហេតុ បានត្រឹមរើសសំបក កាទុស្សមួយគ្រាប់ និងសាកសួរនារីរងគ្រោះ រួចនាំយកទៅ ដាក់ពាក្យបណ្តឹង នៅប៉ុស្តិ៍ភ្នំពេញថ្មី ៕

ផ្តល់សិទ្ធដោយ កោះសន្តិភាព