ខេត្តកំពង់ឆ្នាំង ៖ ទណ្ឌិតពន្ធនាគារ ខេត្តកំពង់ឆ្នាំងម្នាក់ បានកាត់ចម្រឹង បង្អួចដែក រត់ចេញរួចកាលពី ចន្លោះម៉ោង១ ទៅម៉ោង២ រំលងអធ្រាត្រ ឈានចូល ថ្ងៃទី៣០ កញ្ញា នៅពន្ធនាគារខេត្ត មានទីតាំងស្ថិតក្នុង ភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។

មន្ត្រីនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត បាននិយាយថា ទណ្ឌិតរូបនោះ មានឈ្មោះ អៀ តាល់ អាយុ៣០ឆ្នាំ មានទីលំនៅ ភូមិតាកែវក្រោម ឃុំបឹងកន្ទួត ស្រុកក្រគរ ខេត្តពោធិ៍សាត់ ។ ទណ្ឌិតរូបនោះ ជាប់ពន្ធនាគារ ពីបទលួចម៉ូតូ ដែលត្រូវបាន នគរបាលចាប់ខ្លួន កាលពីថ្ងៃទី១០ មិនា ២០១១ ពីបទលួចមាន អំពើហិង្សា ហើយត្រូវបាន សាលាដំបូង ខេត្តកំពង់ឆ្នាំង កាត់ទោសដាក់ ពន្ធនាគាកំណត់៥ឆ្នាំ ។ ពីថ្ងៃកាត់ទោស មកដល់ថ្ងៃរត់រួច មានរយៈពេល ២ឆ្នាំ៦ខែ នៅសល់តែ ២ឆ្នាំ៦ខែទៀត ត្រូវបានរួចខ្លួន។ ប្រភពដដែលបន្តថា ជនសង្ស័យរូបនោះ ធ្លាប់ជាប់ពន្ធនាគារ ម្តងហើយ ពីបទប្លន់ម៉ូតូ តែក្រោយនេះ ខណៈកំពុង ជាប់ពន្ធនាគារ ពីបទលួចម៉ូតូ ក៏លួចការចម្រឹងដែក រត់រួចតែម្តង ។ ប្រភពឱ្យដឹងទៀតថា ចម្រឹងដែកនោះ មានទំហំធំ ប៉ុនមេជើង ដែលត្រូវប្រើរយៈពេល យូរថ្ងៃណាស់ ទើបដាច់ទាំងលើ ទាំងក្រោម ។

លោក ពៅ វុទ្ធី ប្រធានពន្ធនាគារ ខេត្តកំពង់ឆ្នាំង បាននិយាយឱ្យដឹងថា នៅមុនពេល កើតហេតុ អំឡុងម៉ោងជិត២ រំលងអធ្រាត្រ ខណៈដែលមាន ការប្តូរវេនយាម មន្ត្រីពន្ធនាគារ ៣នាក់ម្តង និងមន្ត្រីល្បាត ក៏ត្រូវចេញល្បាតដែរ ស្រាប់តែបាន ប្រទះឃើញ ទណ្ឌិតឈ្មោះ អៀ តាល់ ឡើងលើ របងពន្ធនាគារ ភ្លាមនោះក៍បាន ស្រែកឆោឡោ នាំគ្នាចេញដេញចាប់ តែទណ្ឌិតខាងលើ បានហក់ចេញផុត ពីរបងពន្ធនាគារ ខេត្តទៅក្រៅ ដោយស្ថានភាព យប់ងងឹតពេក ធ្វើឱ្យទណ្ឌិតខាងលើ រត់គេចខ្លួនបាត់។ ទណ្ឌិតខាងលើនេះ នៅក្នុងបន្ទប់ ឃុំឃាំង(B1)។ លោកបន្តថា ភ្លាមៗនោះដែរ លោកបានរាយការណ៍ ជូនលោកអភិបាលខេត្ត និងលោកអគ្គនាយក នៃនាយកដ្ឋាន ពន្ធនាគារ លោកព្រះរាជអាជ្ញា និងលោកស្នងការ នគបាល ព្រហ្មទណ្ឌខេត្ត។

ប្រភពពីមន្ត្រីពន្ធនាគារម្នាក់ បាននិយាយថា ការដែលរត់រួចនោះ មិនមែនរត់តែម្នាក់ទេ គឺមានបំណង រត់ចេញជាច្រើននាក់ តែដោយសារ មន្ត្រីអនុរក្ស ដែលដើរល្បាតទាន់ ទើបរត់រួចតែម្នាក់៕

ផ្តល់សិទ្ធដោយ កោះសន្តិភាព