ភ្នំពេញ៖ មនុស្សប្រុសស្រី ៧នាក់ បាននាំគ្នាទៅ ដេកផ្ទះសំណាក់ យីហោ ម៉េងមានជ័យ ស្ថិតនៅក្នុងភូមិ ត្រពាំងល្វា សង្កាត់កាកាប ខណ្ឌពោធិ៍សែនជ័យ ត្រូវបាននគរបាល ធ្វើការឃាត់ខ្លួនបាន ៣នាក់ ក្នុងនោះ ស្រីម្នាក់ ប្រគល់ទៅឲ្យ អាវុធហត្ថក្រុង ចាត់ការទៅ តាមផ្លូវច្បាប់ ។ ហេតុការណ៍នេះ កើតឡើងកាលពី វេលាម៉ោង ៨និង២០ នាទី យប់ថ្ងៃទី ២៧ ខែកញ្ញា ឆ្នាំ២០១៤ ។

បើយោងតាម ប្រភពព័ត៌មាន បានឲ្យដឹងថា មនុស្សទាំង៣នាក់ ត្រូវនគរបាលឃាត់ ខ្លួនប្រគល់ទៅឲ្យ អាវុធហត្ថ នោះ ពុំត្រូវបានគេស្គាល់ ឈ្មោះនោះទេ ក្នុងនោះស្រីម្នាក់ ។

ប្រភពព័ត៌មានពី ម្ចាស់ផ្ទះសំណាក់វិញ បាននិយាយថា មានមនុស្សប្រុស៦ ស្រីម្នាក់ បាននាំគ្នាចូល ទៅដេកក្នុង ផ្ទះសំណាក់របស់ពួកគាត់ ពេលនោះពួកគាត់ បានសួរនាំរក អត្តសញ្ញាណប័ណ្ណ ដើម្បីទុកជា ឯកសារ ប៉ុន្តែពេល សួរនាំនោះ ពួកគេប្រាប់ថា មិនមានគ្រប់គ្នានោះទេ ដោយមានតែ អត្តសញ្ញាណប័ណ្ណ តែ១សន្លឹក និងកាតទាហាន ១សន្លឹក ទើបពួកគាត់ ឆ្លើយតបវិញថា មិនហ៊ានទទួលឲ្យ សម្រាកនោះទេ ធ្វើឲ្យអ្នកទាំង៧នាក់ ដែលត្រូវជាភ្ញៀវ ច្រឡោតខឹងយ៉ាងខ្លាំង ដោយប្រើ ពាក្យសំដីខ្លាំងៗ មកលើម្ចាស់ផ្ទះ សំណាក់ រហូតឈានដល់ វាយតប់គ្នា រវាងម្ចាស់ ផ្ទះសំណាក់ និងភ្ញៀវ ដោយភាគីទាំង សងខាងមានគ្នា ៧នាក់ ដូចគ្នា ភ្លាមៗនោះនគរបាល មូលដ្ឋាន បានចុះទៅដល់ ចូលសាកសួរ ក៏ឃាត់ខ្លួនបានមនុស្ស ៣នាក់ ទាហានម្នាក់ អាវុធហត្ថម្នាក់ និងនារីម្នាក់ ផងដែរ បញ្ជូនទៅកាន់ ប៉ុស្តិ៍នគរបាល ប៉ុន្តែដោយម្នាក់ជាទាហាន និងម្នាក់ជាមន្ត្រីអាវុធហត្ថ ក៏ប្រគល់ទៅឲ្យ អាវុធហត្ថ ក្រុងចាត់ការបន្ត ៕

ផ្តល់សិទ្ធដោយ ដើមអម្ពិល