គ្រាន់តែលេងជាមួយនឹង ប្រដាប់ក្មេងលេង ដូចជាក្មេងដទៃទៀតប៉ុណ្ណោះ ប៉ុន្តែ Evan អាយុ ៨ ឆ្នាំ បែរជាអាចរក ប្រាក់ចំណូលបាន ដល់ទៅ ១.៣ លានដុល្លារសហរដ្ឋអាមេរិក ក្នុងមួយឆ្នាំ ដោយគ្រាន់តែ មានគណនី គេហទំព័រ យូធូប ផ្ទាល់ខ្លួន ក្នុងការផលិតជាវីដេអូ ដើម្បីធ្វើការវាយតម្លៃ ទៅលើ ប្រដាប់ក្មេងលេង និងវីដេអូហ្គេមសម្រាប់កុមារ ជាដើម។

នេះជាគំនិតផ្តួចផ្តើមដំបូង របស់ឳពុក លោក Jared ជាមួយនឹង Evan ដោយពួកគេទាំងពីរ សម្រេចបង្កើត Channel គេហទំព័រយូធូប ដែលមាន ឈ្មោះថា EvanTubeHD។ រាល់វីដេអូនីមួយៗ នៅក្នុង Channel មួយនេះ គឺសុទ្ធសឹងតែមានអ្នកចុចទស្សនា មិនក្រោមមួយលានដង នោះទេ។

បើតាមសម្តីលោក Jared ឳពុក Evan បានឲ្យដឹងថា ប្រាក់ចំណូលភាគច្រើន គឺបានមកពីផ្ទាំងផ្សព្វផ្សាយ ដែលផុសចេញឡើង នៅពេលកំពុង តែទស្សនាវីដេអូនោះ។ លោកបានបន្តទៀតថា ប្រាក់ទាំងនេះ លោកមិនត្រឹមតែយកទៅ បណ្តាក់ទុនវិនិយោគនោះទេ ថែមទាំងបង្កើតគណនីសន្សំ របស់ធនាគារ សម្រាប់ Evan និងប្អូនស្រីរបស់គេ Jillian អាយុ ៦ ឆ្នាំ ផងដែរ។

ទន្ទឹមនឹងនោះដែរ លោក Jared និងភរិយា ក៏មានក្តីព្រួយបារម្ភខ្លះៗដែរ ចំពោះសុខសុវត្ថិភាព របស់កូនប្រុស ដោយអ្នកទាំងពីរ នៅស្ទាក់ស្ទើរ ក្នុងការបង្ហាញជាសាធារណៈ នូវរាល់ព័ត៌មាន ទាំងឡាយណា ដែលពាក់ព័ន្ធនឹង Evan តួយ៉ាងដូចជា កន្លែងដែលស្នាក់នៅ និងសាលារៀនរបស់ Evan ជាដើម។

គួរបញ្ជាក់ផងដែរថា ក្រុមគ្រួសារលោក Jared មិនមែនមានតែ Channel យូធូប EvanTubeHD នេះតែមួយទេ ពោលគឺនៅមានពីរទៀត ដូចជា EvanTubeRaw ដែលផ្តិតយកទិដ្ឋភាពនៅក្រោយ ការថតវីដអូ និង EvanTubeGaming ដែលផ្តោតសំខាន់ទៅលើ វីដេអូហ្គេម សម្រាប់ឳពុក និងកូន៕

បើចង់ដឹងច្បាស់ ទស្សនាខាងក្រោម៖

aaaaaaaaaaaaaaaaaaaaaa