អាយុ៥ឆ្នាំសោះ តែកម្ពស់ ១,៧០ម៉ែត្រ ជាប់កំណត់ត្រាពិភពលោក

អាយុ៥ឆ្នាំសោះ តែកម្ពស់ ១,៧០ម៉ែត្រ ជាប់កំណត់ត្រាពិភពលោក

កុមារម្នាក់នៅប្រទេសឥណ្ឌាឈ្មោះ Karan Singh ដែលមានអាយុទើប ៥ឆ្នាំ តែមានកម្ពស់ដល់ទៅ ១,៧០ម៉ែត្រ ក្លាយជាក្មេងដែលខ្ពស់ជាងគេបំផុតលើលោកក្នុងវ័យដូចគ្នា។

Karan Singh (កណ្ដាល) និងកុមារវ័យស្របាលគ្នា

ទោះយ៉ាងណា វាមិនមែនជារឿងភ្ញាក់ផ្អើលអីទេ ព្រោះ Singh បានប្រសូតក្នុងគ្រួសារមហាកម្ពស់ស្រាប់ទៅហើយ។ ឪពុករបស់ Singh មានកម្ពស់ ១,៩២ម៉ែត្រ ខណៈម្ដាយមានកម្ពស់ដល់ទៅ ២,១៨ម៉ែត្រ ដែលជាស្ត្រីខ្ពស់ជាងគេបំផុតក្នុងប្រទេសឥណ្ឌារហូតដល់ឆ្នាំ ២០១២។ ក្ដីសុបិនរបស់កុមារាកម្ពស់ដាច់គេលើលោកនេះ គឺចង់ក្លាយជាកីឡាករបាល់បោះអាជីពម្នាក់ ហើយវេជ្ជបណ្ឌិតក្នុងតំបន់បានបញ្ជាក់ថាក្ដីស្រមៃនេះអាចក្លាយជាការពិត ព្រោះ Singh គ្មានបញ្ហាសុខភាពអ្វីឡើយ។

ក្នុងឆ្នាំ ២០០៨ Karan Singh ធ្លាប់ជាប់កំណត់ត្រាពិភពលោកម្ដងរួចមកហើយ ជាទារកដែលធ្ងន់ និងវែងជាងគេបំផុតពេលកើតភ្លាម ដោយមានប្រវែងខ្លួនជាង ៦តឹក និងទម្ងន់ប្រហែល ៧គីឡូក្រាម។