ក្រុងប៉ោយប៉ែត ៖ កាលពីព្រឹក ម៉ោង១០ និង៣០នាទី ថ្ងៃទី១៨ ខែកញ្ញា ឆ្នាំ២០១៤ ក្រុមអាជីវករខ្មែរ ដែលមានមុខរបរ ចេញចូលរកស៊ី ក្នុងទឹកដីថៃ មានគ្នាប្រមាណ ជាង១០០នាក់ បានផ្ទុះកំហឹង នាំគ្នាធ្វើបាតុកម្ម សារជាថ្មី ដោយយករថយន្ត ជាច្រើនគ្រឿង បិទច្រកទ្វារ អន្តរជាតិ ប៉ោយប៉ែតតែម្តង ដើម្បីជាការព្រមាន ដល់អាជ្ញាធរថៃ ដែលកន្លងមក តែងតែធ្វើទុក្ខ បុកម្និញ ដល់ពួកគាត់ មិនចេះឈប់ឈរ លើសពីនេះ ទៅទៀតនោះ អាជ្ញាធរថៃ បានប្រមាថមើលងាយ ជនជាតិខ្មែរថា ជាឆ្កែសុំទាន ចូលក្នុងប្រទេស របស់គេទៀតផង ។

លោក ម៉ង់ ពុទ្ឋី ជាមេក្រុមបាតុករ បានថ្លែងប្រាប់ ឱ្យដឹងថា មូលហេតុដែល ក្រុមបាតុករ បិទច្រកទ្វារអន្តរ ជាតិប៉ោយប៉ែត នាពេលនេះ គឺដោយសារ តែពួកគាត់ស៊ូទ្រាំ នឹងការប្រមាថ មើលងាយ មើលថោក ពីសំណាក់ សមត្ថកិច្ចថៃ មិនបាន ដោយពួកគេ ប្រើពាក្យសម្តី អសុរសមើលងាយ មកលើក្រុម រូបលោកជាខ្មែរ ។ លោកបន្តថា សមត្ថកិច្ចភាគីថៃ ពេលដែលឃើញ ជនជាតិខ្មែរ បើករថយន្តចូល ទៅក្នុងទឹកដីថៃ ពួកគេតែងតែជេរថា ពួកអាខ្មែរសុំទាន ក្រៅតែពីការជេរប្រមាថ សមត្ថកិច្ចថៃ បានរឹតបណ្តឹង គ្រប់បែបយ៉ាង មកលើរថយន្តខ្មែរ ដែលចេញចូល ប្រទេសថៃ ខណៈដែល រថយន្តថៃ ដឹកទំនិញ ចេញចូលមក ក្នុងប្រទេសកម្ពុជា រាប់ពាន់គ្រឿង ក្នុងមួយថ្ងៃៗ តាមទំនើងចិត្ត គ្មានសមត្ថកិច្ច កម្ពុជាណាមួយ ហ៊ានទៅក្បែរ រថយន្តថៃឡើយ ខុសពីរថយន្តខ្មែរ នៅពេលចូលទៅ ក្នុងទឹកដីថៃម្តងៗ ភ្នែកនៅនឹងកញ្ចឹង.ក ត្រូវសមត្ថកិច្ចថៃ មើលងាយមើលថោក សព្វបែបយ៉ាងតែម្តង ៕

ប្រភព៖ khmerload