តារាៗ១ជីវិត មិនខ្ចីប្តូរទ្រនំសោះ!!!

តារាៗ១ជីវិត មិនខ្ចីប្តូរទ្រនំសោះ!!!

ស្ទើរតែជារឿងធម្មតាទៅហើយ សម្រាប់ការផ្លាស់ប្តូរទ្រនំពីមួយទៅមួយសម្រាប់តារាចម្រៀង ខណៈតារាចម្រៀងភាគច្រើនបំផុតឈរលើផ្លូវនេះ ក្នុងនោះមានដូចជា មាស សុខសោភា ឆន សុវណ្ណារាជ សុគន្ធ និសា ជាដើមដែលបានប្តូរផលិតកម្មបន្តបន្ទាប់។ ប៉ុន្តែទន្ទឹមនឹងនោះ គេឃើញមានតារាចម្រៀងតែពីរបីនាក់ប៉ុណ្ណោះ ដែលស្មោះស្ម័គ្រទ្រនំចាស់មិនផ្លាស់ទៅទ្រនំថ្មី នេះដោយគិតត្រឹមពីពួកគេចាប់ផ្ដើមរហូតមកដល់ពេលនេះ។ ពួកគេទាំងនោះមាន៖

លោក ព្រាប សុវត្ថិ ៖ តារាចម្រៀងដែលឈ្មោះដើម “ស្នាយ” រូបនេះ បានចូលធ្វើតារាចម្រៀងអាជីពក្នុងផលិតកម្មហង្សមាសជាង ២០ឆ្នាំមកហើយតាំងពីឆ្នាំ ១៩៩០។ លោក ព្រាប សុវត្ថិ ចាប់ផ្ដើមដំបូងច្រៀងជាគូជាមួយកញ្ញា ទូច ស៊ុននិច និងក្រោយមកលោកត្រូវបានគេស្គាល់តាមរយៈបទ “អូនជាបេះដូងបង” និងបន្តបន្ទាប់ទៀតមានបទចម្រៀងភាគច្រើនបំផុតទទួលបានការគាំទ្រពីអ្នកស្ដាប់។

លោក ព្រាប បានសាងកេរ្តិ៍ឈ្មោះជាកំពូលតារាចម្រៀងប្រចាំប្រទេសដោយស្ថិតក្រោមដំបូលផលិតកម្មនេះ ដោយមិនដែលផ្លាស់ប្តូរទ្រនំឡើយ។ ប៉ុន្តែប្រមាណជាកន្លះឆ្នាំមុននេះ ធ្លាប់ធ្លាយព័ត៌មានមិនផ្លូវការមកថា លោក អាចនឹងផ្លាស់ទៅផលិតកម្មថោន ប៉ុន្តែលោកបដិសេធន៍។ បើទោះជាបច្ចុប្បន្នមានតារាចម្រៀងថ្មីស្រករក្រោយច្រើន ប៉ុន្តែតំណែងកំពូលរបស់លោកនៅតែរក្សាបាន។

ពេជ្រ សោភា៖ កញ្ញា ពេជ្រ សោភា គឺជាតារាចម្រៀងហង្សមាសម្នាក់ទៀតដែលមិនទាន់បានផ្លាស់ទ្រនំថ្មី។ សោភា បានចូលហង្សមាសអំឡុងឆ្នាំ ១៩៩៩ ក្រោយប្រឡងជាប់ក្នុងមហោស្រពចម្រៀងមួយ។ សោភា ចាប់ផ្ដើមល្បីខ្លាំងនាអំឡុងឆ្នាំ ២០០៤-២០០៦។ បទនាគ្រានោះមានបទ “គ្មានអ្នកយល់ចិត្ត” “ល្មើសស្នេហ៍” “បេះដូងត្រដរខ្យល់” ជាដើម។ រយៈពេលជាង១០ឆ្នាំ ពេជ្រ សោភា នៅតែជាតារាចម្រៀងហង្សមាសដដែល ដោយមិនមែនមានព័ត៌មានស្ដីពីការផ្លាស់ប្តូរទ្រនំឡើយ។

អាន៖ ស្ងាត់ៗ…យុគ ចិន្តា ក្លាយជាអ្នកបកប្រែភាសាថៃ

ណុប បាយ៉ារិទ្ធ៖ លោក គឺជាតារាចម្រៀងហង្សមាសទី៣ដែលជាប់ជាតារាស្មោះស្ម័គ្រនឹងផលិតកម្មដើម “ហង្សមាស” ដែរ។ លោកបានក្លាយជាតារាចម្រៀងអាជីពរបស់ហង្សមាសស្របាលៗលោក ព្រាប សុវត្ថិដែរ ក្រោមការផ្ចុងផ្ដើមដោយលោក ហ្វៃ សំអាង។ បទដែលជួយឲ្យលោកផ្ដើមមានកេរ្តិ៍ឈ្មោះ គឺបទ “សុំចែកបេះដូង”។ ចំណុចមួយទៀតដែលលោកមានដូចលោក ព្រាប សុវត្ថិ គឺមកទល់នឹងបច្ចុប្បន្ន លោកនៅតែឈរជើងយ៉ាងរឹងមាំក្នុងអាជីពជាតារាចម្រៀង។ លោកមិនដែលមានព័ត៌មានអំពីការផ្លាស់ប្តូរផលិតកម្មច្រៀងឡើយ។

មាស សាលី៖ តមកនេះ ដល់តារាចម្រៀងផលិតកម្មសាន់ដេម្តង។ លោក មាស សាលី តស៊ូធ្វើជាតារាចម្រៀងក្នុងផលិតកម្មសាន់ដេអំឡុងឆ្នាំ ២០០០ ។ រហូតមកដល់ អំឡុងឆ្នាំ ២០០៥-២០០៦ ទើបលោកបានសាងកេរ្តិ៍ឈ្មោះល្បីរន្ទឺជាមួយផលិតកម្មមួយនេះ ក្នុងនោះមានបទ “អង្គរក្សបេះដូង” “ទីប្រឹក្សាស្នេហ៍” ជាដើម។ មកទល់បច្ចុប្បន្ន បើទោះលោកមិនមានបទចម្រៀងអាចទាក់ទាញអ្នកស្ដាប់ខ្លាំង ប៉ុន្តែលោកនៅតែជាតារាចម្រៀងសាន់ដេនៅឡើយ។

ប្រភព៖ sabay

មុន បន្ទាប់

មតិយោបល់