1 សង្ស័យមេរោគមរណៈអេបូឡា មកដល់វៀតណាម

1 សង្ស័យមេរោគមរណៈអេបូឡា មកដល់វៀតណាម

មន្ត្រីសុខាភិបាលនៃប្រទេសវៀតណាមបានដាក់មនុស្សបីនាក់ឲ្យនៅដាច់ឆ្ងាយពីគេនាមន្ទីរពេទ្យក្រុងហូជីមិញ ក្រោយត្រលប់មកពីប្រទេសលីបេរីយ៉ាដោយមានអាការៈគ្រុនក្ដៅក្នុងខ្លួន។

វេជ្ជបណ្ឌិត Nguyen Van Vinh Chau ប្រធានផ្នែកជំងឺតំបន់ត្រូពិកនៃមន្ទីរពេទ្យក្រុងហូជីមិញ បានបញ្ជាក់កាលពីថ្ងៃព្រហស្បតិ៍ម្សិលមិញនេះថា ពិតជាមានការដាក់មនុស្សបីនាក់ឲ្យព្យាបាលដាច់ឆ្ងាយពីគេនៅមន្ទីរពេទ្យមែន។

អ្នកជំងឺដែលគេសង្ស័យថាមានផ្ទុកមេរោគអេបូឡានេះ បានវិលត្រលប់ពីលីបេរីយ៉ា មកដល់មាតុប្រទេសវិញកាលពីយប់ថ្ងៃពុធនៅព្រលានយន្តហោះ Tan Son Nhat។ ឧបករណ៍តាមដានសីតុណ្ហភាពនៅព្រលាននោះ បានសម្គាល់ឃើញថាមានការឡើងកម្ដៅខុសធម្មតាក្នុងចំណោមមនុស្សទាំងបីនាក់ ហើយពួកគេក៏ត្រូវបញ្ជូនភ្លាមៗទៅកាន់មន្ទីរពេទ្យ។

រហូតមកដល់ពេលនេះលោក Chau និយាយថា អ្នកជំងឺបានធូរស្បើយបន្តិចហើយ។ ប្រសិនបើគ្រុនក្ដៅមិនវិវឌ្ឍនលើសពីនេះទេ អ្នកជំងឺនឹងត្រូវអនុញ្ញាតឲ្យចេញទៅផ្ទះមុនរសៀលថ្ងៃសុក្រនេះ ប៉ុន្តែត្រូវស្ថិតនៅក្រោមការតាមដានរបស់មន្ត្រីសុខាភិបាលដដែល។

មេរោគអេបូឡាកំពុងមានការរីករាលដាលយ៉ាងឆាប់រហ័សនៅអាហ្វ្រិកខាងលិច ហើយប្រទេសរងគ្រោះខ្លាំងជាងគេមានបីគឺ ហ្គីណេ សេរ៉ាឡេអូន និងលីបេរីយ៉ា។ ចំណែកឯនៅអាស៊ីវិញ មិនទាន់មានប្រទេសណាមួយទទួលរងការវាយប្រហារដោយមេរោគមរណៈនេះទេ។ កាលពីថ្ងៃទី ១០ កន្លងទៅ អង្គការសុខភាពពិភពលោកបានប្រកាសថាអ្នកស្លាប់ដោយអេបូឡាមានយ៉ាងតិច ២២៩៦ នាក់ហើយ៕

ប្រភព៖ Sabay

មុន បន្ទាប់

មតិយោបល់