Sojung សមាជិកក្រុម Ladies’ Code ត្រូវសម្រាកព្យាបាលនៅមន្ទីរពេទ្យ ៦ខែទៀត

Sojung សមាជិកក្រុម Ladies’ Code ត្រូវសម្រាកព្យាបាលនៅមន្ទីរពេទ្យ ៦ខែទៀត

ថ្មីៗនេះផលិតកម្ម Polaris Entertainment ដែលជាអ្នកគ្រប់គ្រងក្រុមចម្រៀងនារីកូរ៉េ Ladies’ Code បានបង្ហើបថា សមាជិក Sojung នៃក្រុមចម្រៀងនេះ នឹងត្រូវសម្រាកព្យាបាលរយៈពេល ៦ខែបន្តទៀតបន្ទាប់ពីការវះកាត់។

LadiesCode_Sojung

បើទោះជា Sojung បានឆ្លងកាត់ការវះកាត់ឆ្អឹងថ្គាមខាងលើភ្លាមៗបន្ទាប់ពីជួបគ្រោះថ្នាក់ និងការវះកាត់មួយទៀតកាលពីថ្ងៃទី៥ ខែកញ្ញា កន្លងទៅក្ដី ប៉ុន្តែនាងត្រូវទទួលការព្យាបាល៦ខែបន្តទៀត។ អ្នកនាំពាក្យផលិតកម្មនេះ បាននិយាយថា “ក្រុមគ្រូពេទ្យនឹងសម្រេចចិត្តថាតើ នាងនឹងត្រូវទទួលការវះកាត់បន្តទៀតឬយ៉ាងណា បន្ទាប់ពីស្ថានភាពរបស់នាងធូរស្បើយជាងបច្ចុប្បន្ន។ គ្រូពេទ្យបានសន្និដ្ឋានថានាងត្រូវសម្រាកព្យាបាលប្រហែលជា ៦ខែទៀត”។

អ្នកនាំពាក្យរូបនេះបានឲ្យដឹងពីស្ថានភាពបច្ចុប្បន្នរបស់ Sojung ទៀតថា នាងទើបតែដឹង និងមានអារម្មណ៍តក់ស្លុតយ៉ាងខ្លាំងចំពោះការស្លាប់របស់សមាជិករួមក្រុមទាំងពីរនាក់ គឺ RiSe និង EunB។

គ្រោះថ្នាក់ចរាចរណ៍រអិលរថយន្តបុករនាំងផ្លូវដែលបានកើតឡើងចំពោះក្រុមចម្រៀង Ladies’ Code នេះបានកើតឡើងកាលពីយប់រំលងអាធ្រាត្រចូលថ្ងៃអង្គារ ទី២ ខែកញ្ញា ដែលធ្វើឲ្យសមាជិក EubB ស្លាប់នៅកន្លែងកើតហេតុ សមាជិក RiSe រងរបួសធ្ងន់និងបានស្លាប់នៅមន្ទីរពេទ្យកាលពីថ្ងៃអាទិត្យ ហើយសមាជិក ៣នាក់ផ្សេងទៀតរបួស។

Sojung បច្ចុប្បន្នមានអាយុ ២១ឆ្នាំ ហើយមុនចូលជាសមាជិកក្រុម Ladies’ Code នាងធ្លាប់ចូលប្រឡង ក្នុងកម្មវិធី The Voice Korea និងបានជាប់ត្រឹមវគ្គ ៨នាក់ចុងក្រោយ ៕

ប្រភប៖ Sabay

មុន បន្ទាប់

មតិយោបល់