មូលហេតុមួយចំនួន ធ្វើឲ្យតារាខ្មែរ ៥ រូប បួសជាសង្ឃ

មូលហេតុមួយចំនួន ធ្វើឲ្យតារាខ្មែរ ៥ រូប បួសជាសង្ឃ

គិតមកដល់ពេលនេះ យ៉ាងហោចណាស់ មានតារាខ្មែរចំនួន ៥ រូប ហើយ ដែលបានសម្រេចចិត្តលាចាកភាពឡូយឆាយក្នុងសង្គមសិល្បៈ ជាបណ្ដោះអាសន្ន ហើយចូលសាងផ្នួសជាសង្ឃ ក្នុងមូលហេតុផ្សេងគ្នា។ តើមូលហេតុទាំងនោះមានអ្វីខ្លះ?

១. ពិធីករ ដួង សុខគា បួសព្រោះថែវប្បធម៌៖ ដើម្បីបំពេញកាតព្វកិច្ចជាកូនខ្មែរ ដែលត្រូវថែវប្បធម៌ ពិធីករ ដួង សុខគា បានសាងផ្នួស ១ សប្ដាហ៍ កាលពីឆ្នាំមុន នៅស្រុកកំណើតរបស់ខ្លួន ដោយមានការចូលរួមណែនាំពីសាស្ត្រាចារ្យផ្នែកវប្បធម៌មួយចំនួនផងដែរ។ ម្យ៉ាងទៀត ពិធីកររូបនេះអះអាងថា ក៏មានបំណងជម្រះមន្ទិលសៅហ្មងក្នុងចិត្ត និងសងគុណឪពុកម្ដាយផងដែរ ក្នុងនាមជាអ្នកសិល្បៈបុរាណម្នាក់។ ដួង សុខគា ធ្លាប់បញ្ជាក់ថា នឹងសាងផ្នួសរហូត នៅពេលមានវ័យចំណាស់បន្តិច ក្នុងគោលបំណងអាចសម្ដែងធម៌ទេសនា អប់រំមនុស្សបានច្រើន។

២. នាយ ទុយ សាងផ្នួសជួយម្ដាយ៖ ជាង ១ ឆ្នាំមុន ពិធីករ អ៊ឹង រដ្ឋា ហៅនាយ ទុយ ក៏ធ្លាប់ទៅសាងផ្នួសស្ងាត់ៗនៅវត្តស្លែង ខណៈដែលស្ថានភាពជំងឺម្ដាយកាន់តែមានភាពយ៉ាប់យ៉ឺន។ នាយ ទុយសង្ឃឹមថា អានិសង្សកើតចេញពីការសាងផ្នួសនោះ អាចទ្រទ្រង់ម្ដាយឲ្យគេគេចចេញពីការឈឺចាប់ បណ្ដាលមកពីជំងឺប្រចាំកាយ និង មានអាយុវែង។ ប៉ុន្តែម្ដាយរបស់នាយបានលាចាកលោកនៅថ្ងៃទី ២៥ ខែ ធ្នូ ឆ្នាំ២០១៣ កន្លងទៅ ដោយរាងកាយមិនអាចទប់ទល់ជាមួយជំងឺតទៅទៀតបាន។

៣. ឌីជេ ឡាយអិន បួសបាន ១ ថ្ងៃ ម្ដាយស្លាប់ចោល៖ មិនខុសពីនាយ ទុយ ប៉ុន្មានទេ ចុងឆ្នាំ ២០១៣ ឌីជេ ឡាយអិន បានសម្រេចចិត្តចូលសាងផ្នួសនៅវត្តសារាវ័ន្ត រយៈ ៧ ថ្ងៃ ដើម្បីប្រមែប្រមូលអានិសង្ស ដោយជឿជាក់ថា អាចធ្វើឲ្យម្ដាយរបស់គេ បានរួចផុតពីការធ្វើទុក្ខបុកម្នេញនៃជំងឺមហារីក រ៉ាំរ៉ៃជាយូរមកហើយ។ អកុសល គ្រងស្បង់ជាសាមណេរមិនបានប៉ុន្មានម៉ោងផង ស្រាប់តែម្ដាយរបស់គេបានទទួលអនិច្ចកម្ម នៅមន្ទីរពេទ្យរុស្ស៊ី។ ឡាយអិន ប្រាប់ថា ម្ដាយរបស់គេស្ងប់ចិត្ត ត្បិតបានស្លាប់លើដៃរបស់កូន ពេលនៅជាសាមណេរមួយអង្គ។

៤. ខាត់ ចំរើន សាងផ្នួសព្រោះឪពុកឈឺធ្ងន់៖ ក្រោយពីស្ថានភាពជំងឺរបស់ឪពុកចាប់ផ្ដើមធូរស្រាលបន្តិច តារាកំប្លែង ខាត់ ចំរើន រត់ទៅសាងផ្នួសជាសង្ឃកាលពីថ្ងៃទី ២ ខែ កញ្ញា ឆ្នាំ២០១៤ កន្លងទៅ នៅវត្តនន្ទមុន្នី ក្នុងសង្កាត់ស្ទឹងមានជ័យ ក្រោមការជ្រោមជ្រែងពីបងស្រី ខាត់ សុឃីម។ ចំរើន បានប្រាប់ថា ជាប់ជំពាក់ពាក្យសំដីជាមួយឪពុកថា ចូលបួសតាំងពីក្មេងឯស្រុកកំណើត តែក៏ត្រូវពន្យាររហូតមកដល់បច្ចុប្បន្ន។ ចូលដល់វ័យជាង ៣០ ឆ្នាំ រូបគេក៏សម្រេចសុំប្រពន្ធកូនសាងផ្នួស ខណៈដែលសទ្ធាកើតមានក្នុងចិត្ត និង ដើម្បីសងគុណឪពុកម្ដាយ។

៥. គឹម សីហា ក្រោយជួបគ្រោះថ្នាក់ចរាចរណ៍៖ កាលពីថ្ងៃទី ៨ ខែ កញ្ញា នេះ តារាសម្ដែងជាបុរសសង្ហា គឹម សីហា សុខចិត្តចាកចេញពីសង្សាររយៈពេលកន្លះខែ ដើម្បីសាងផ្នួសជាសង្ឃនៅវត្តបទុមវតី ក្នុងរដូវកាន់បិណ្ឌ និង ភ្ជុំបិណ្ឌនេះ ដោយអះអាងថា ជាការសងគុណចំពោះអ្នកមានគុណទាំងទ្វេ។ ទោះបីជាយ៉ាងណា មានការលើកឡើងថា ប្រហែលជាតារាសម្ដែងរូបនេះ បួសដើម្បីជម្រះមន្ទិលចង្រៃចេញពីខ្លួនឲ្យអស់ ព្រោះទើបត្រឡប់មកពីព្យាបាលនៅប្រទេសថៃ ក្រោយជួបគ្រោះថ្នាក់នាំឲ្យប៉ះពាល់ក្បាលធ្ងន់ធ្ងរកាលពីពេលថ្មីនេះ៕