Vjរតនា ធ្វើខួបឌឺគេ ប៉ុន្តែយំខ្លួនឯង

Vjរតនា ធ្វើខួបឌឺគេ ប៉ុន្តែយំខ្លួនឯង

លោក ធីនរៈ រតនា ហៅ Vjរតនា ពិធីកររបស់ស្ថានីយទូរទស្សន៍CTN ល្ងាចមិញនេះ បានធ្វើខួបគម្រប់ ២៩ឆ្នាំរបស់ខ្លួន។ ក្រៅពី ពិធីខួបកំណើត តារារូបនេះប្រាប់ថា ចង់ធ្វើដើម្បីឌឺសង្សារចាស់របស់ខ្លួន ប៉ុន្តែនៅវគ្គផ្លុំទៀន លោកបែរជាស្រក់ទឹកភ្នែកខ្លួនឯងទៅវិញ។

ទឹកភ្នែកស្រក់ចុះពិតជាមិនមែនគ្មានបញ្ហាមែន ប៉ុន្តែ រតនាអះអាងថាមិនមែនមកពី អវត្តមានអតីតសង្សារទេ ប៉ុន្តែមកពីលោករំជួលចិត្តខ្លាំងពេក ទៅនឹងទំហំទឹកចិត្តម្ដាយ ដែលតែងតែចាំផ្ដល់កម្លាំងចិត្តដល់លោក គ្រាដែលមានរឿងពិបាកចិត្តម្ដងៗ។

Vjរតនា បានប្រាប់ថា ចាប់តាំងពីប្រលូកសិល្បៈលោកបានធ្វើពិធីខួបកំណើតទ្រង់ទ្រាយធំ៣ឆ្នាំជាប់គ្នាហើយ ក្នុងនោះ២ឆ្នាំកន្លងទៅ ពិធីខួបរបស់លោក តែងតែមានវត្តមាន កញ្ញា សន នាងផល្លីកា ដែលជាអតីត សង្សារជានិច្ច ប៉ុន្តែឆ្នាំនេះលោក មិនបានអញ្ជើញទេ។ ថ្វីត្បិតតែធ្លាប់រស់នៅក្រោមដំបូលផ្ទះជាមួយគ្នាជាង២ឆ្នាំ ប៉ុន្តែឆ្នាំនេះ មិនមានមុខស្ត្រីម្នាក់នេះឡើយ បន្ទាប់ពីចែកផ្លូវគ្នាជិត១ឆ្នាំមកហើយ។

Vjរតនា និងម្ដាយ

ពិធីករទូរទស្សន៍វោហាសព្ទចាក់ទឹកមិនលិចនេះ បានប្រាប់ថា ការធ្វើខួបល្ងាចមិញនេះ លោកចង់ផ្ញើសារ ទៅសង្សារចាស់របស់លោកថា ទោះបីជាមិនមានវត្តមាននាង ក៏លោកនៅតែអាចធ្វើខួបរបស់ខ្លួនបាន។ ទោះមានការតាំងចិត្តយ៉ាងរឹងមាំបែបនេះក្ដី ប៉ុន្តែពិធីករពូកែវោហារស័ព្ទម្នាក់នេះ បែរជាបង្ហូរទឹកភ្នែកទៅវិញ គ្រាដែលលោកកាន់ក្បាលមេក្រូ និយាយទៅ កាន់ភ្ញៀវដែលចូលរួម មុនផ្លុំទៀននំខួបពន្លត់។

Vjរតនា បាននិយាយដោយលាយឡំនិងទឹកភ្នែកថា នៅលើលោកនេះ មិនមានស្រីណា ដែលល្អជាង ម្ដាយរបស់ខ្លួនឡើយ អតីតសង្សារគ្រាន់តែជាអ្នកដទៃប៉ុណ្ណោះ។ លោកបានបន្ថែមថា ចាប់ពីពេលនេះតទៅ អ្វីដែលលោកត្រូវគិត គឺរឿង ការងារ និងក្រុមគ្រួសារប៉ុណ្ណោះ ចំពោះស្នេហាសូមផ្អាកសិនហើយ៕