ពិធី​បុណ្យ​សព​របស់​តារា​ចម្រៀង​កូរ៉េ RiSe សមាជិក​ទី​២ របស់​ Ladies’ Code ដែល​បាន​បាត់បង់​ជីវិត​ដោយ​សារ​គ្រោះថ្នាក់​ចរាចរ​ បាន​ប្រារព្ធ​នៅ​ព្រឹក​ថ្ងៃ​ទី​៩ ខែ​កញ្ញា​នេះ នៅ​សាកលវិទ្យាល័យ​វេជ្ជសាស្ត្រ​កូរ៉េ Anam ដោយ​មាន​វត្តមាន​ក្រុម​គ្រួសារ​ និង​មិត្ត​រួម​អាជីព​របស់​នាង​ជា​ច្រើន​នាក់។

តាម​រយៈ​រូបភាព​ជា​ច្រើន​សន្លឹក​បញ្ចេញ​ដោយ​គេហទំព័រ Dispatch គេ​ឃើញ​សមាជិក​ទាំង ៣​នាក់​របស់ Ladies’ Code ដែល​បាន​រួច​ជីវិត​ពី​ហេតុការណ៍​នេះ រួម​មាន Zuny, Ashely, និង Sojung ដែល​សុទ្ធ​តែ​មាន​របួស​ជាប់​ខ្លួន​នៅ​ឡើយ បាន​មក​ជូន​ដំណើរ​មិត្ត​រួម​ក្រុម​របស់​ពួក​គេ​ទាំង​ទឹក​ភ្នែក ជាមួយ​ក្រុម​ការងារ​ផលិតកម្ម Polaris ជា​ច្រើន​នាក់​ទៀត។

យ៉ាង​ណា​ ​អ្នក​ដែល​ក្រៀមក្រំ​បំផុត​គឺ​ក្រុម​គ្រួសារ​របស់ RiSe ជា​ពិសេស​ម្ដាយ​របស់​នាង​បាន​យំ​រហូត និង​ស្រែក​ហៅ ឈ្មោះ​​កូន​​មិន​ឈប់​តាំង​ពី​ចាប់​ផ្ដើម​ដល់​បញ្ចប់​កម្មវិធី។ ស្នាម​ញញឹម​ RiSe ពី​ក្នុង​រូបថត​ ពិត​ជា​ធ្វើ​ឲ្យ​អ្នក​ចូលរួម​ក្នុង​កម្មវិធី​ទាំង​អស់​ទប់​ទឹក​ភ្នែក​មិន​ជាប់ ដោយ​សារ​ក្ដី​អាណិត​អាសូរ និង​សោកស្ដាយ​ចំពោះ​ការ​ស្លាប់​ទាំង​វ័យ​ក្មេង ២៣​ឆ្នាំ​បែប​នេះ។

សាកសព​របស់ RiSe នឹង​ត្រូវ​នាំ​យក​ទៅ​ប្រទេស​ជប៉ុន ដើម្បី​រៀប​ចំ​ពិធី​បុណ្យ​ម្ដង​ទៀត​ជាមួយ​ក្រុម​គ្រួសារ និង​សាច់ញាតិ​ជិត​ស្និទ្ធ​របស់​នាង​នៅ​ទីនោះ ដែល​ជា​ទឹក​ដី​ដែល​នាង​ធ្លាប់​រស់​នៅ​តាំង​ពី​តូច ៕