ពែកមី និង ខ្ញុង ធ្លាក់ថ្លៃនៅអាមេរិក នៅយប់ចុងក្រោយ

ពែកមី និង ខ្ញុង ធ្លាក់ថ្លៃនៅអាមេរិក នៅយប់ចុងក្រោយ

តារាកំប្លែង នាយ ពែកមី និង នាងខ្ញុង បានបញ្ចប់ការសម្ដែងចុងក្រោយរបស់ខ្លួនហើយលើទឹកដីសហរដ្ឋអាមេរិកនៅយប់មិញនេះ។ សំបុត្រចូលទស្សនារបស់ពួកគេ ដែលដើមឡើយដាក់លក់ក្នុងតម្លៃ ៥០ ដុលារនោះ ប៉ុន្តែនៅយប់ចុងក្រោយនេះ លក់ត្រឹមតែ ពី ៣៥ ដុល្លារ ទៅ ២៥ ដុល្លារ ប៉ុណ្ណោះ។

គិតត្រឹមថ្ងៃនេះ ពែកមី និង ខ្ញុង បានទៅសម្ដែងគ្រប់ ១ ខែ ហើយ លើទឹកដីអាមេរិក ពួកគេនឹងត្រឡប់មកប្រទេសកម្ពុជាវិញនៅថ្ងៃទី ១០ ខែ កញ្ញា ឆ្នាំ ២០១៤ ស្អែកនេះ។ ក្នុងរយៈពេល ១ ខែពេញ ពែកមី និង ខ្ញុង បានចេញសម្ដែងប្រហែល ១៥ Show ក្នុងរដ្ឋជាច្រើន។

ក្នុងមួយសប្ដាហ៍ ពួកគេ ត្រូវសម្ដែង ៣ Show។ នេះបើតាមប្រភពច្បាស់ការ ពីប្រជាពលរដ្ឋខ្មែររស់នៅទីនោះសូមមិនបញ្ចេញឈ្មោះ ប្រាប Sabay ព្រឹកមិញ។ ប្រភពនោះបានឲ្យដឹងទៀតថា សំបុត្រចូលទស្សនា ពែកមី និង ខ្ញុង ត្រូវបានលក់ដាច់ខ្លាំងណាស់ ដែលស្ទើរគ្រប់ការសម្ដែងរបស់ពួកគេ មានទស្សនិកជនមកកក់ទុកមុនទាំងអស់។ នៅយប់មិញនេះ ពែកមី ខ្ញុង បានសម្ដែង Show ចុងក្រោយរបស់ខ្លួនក្នុងទីក្រុង Houston រដ្ឋ តិចសាស់ ហើយសំបុត្រត្រូវដាក់លក់ ក្នុងតម្លៃពី ៣៥ ដុល្លារ ទៅ ២៥ ដុល្លារ។

ប្រភពនោះបានលើកឡើងទៀតថា មូលហេតុដែលនាំឲ្យ ពែកមី និង ខ្ញុង ត្រូវបានប្រជាជនខ្មែររស់នៅសហរដ្ឋអាមេរិកគាំទ្រខ្លាំងនោះ ក៏ព្រោះតែពួកគេទាំងពី ជាតារាកំប្លែង ដែលកំពុងពេញនិយមខ្លាំង ជាមួយគ្នានោះ តារាកំប្លែងទាំង ២ សុទ្ធតែមានបទចម្រៀងផ្ទាល់ខ្លួនជាបទល្បីៗ ដែលប្រជាជនខ្មែរចូលចិត្តច្រៀង។ ក្រៅពីការគាំទ្រ ពែកមី និង ខ្ញុង ក៏ទទួលបានលុយធីបច្រើនផងដែរ។