អំណោយសប្បុរសធម៌បានទៅដល់ដៃសិស្សនៅសាលាអូរជ្រៃហើយ

អំណោយសប្បុរសធម៌បានទៅដល់ដៃសិស្សនៅសាលាអូរជ្រៃហើយ

ក្រុមការងារ Sabay ដែលតំណាងឲ្យសប្បុរសធម៌ផ្សេងទៀត បាននាំយកអំណោយជាសម្ភារៈ និង ថវិកា ទៅផ្ដល់ជូនសិស្សនៅសាលាអូរជ្រៃ ឃុំបារាំងធ្លាក់ ស្រុកភ្នំព្រឹក ខេត្តបាត់ដំបង កាលពីថ្ងៃសៅរ៍ចុងសប្ដាហ៍កន្លងទៅនេះ។

អំណោយសប្បុរសជនដែលបានយកទៅចែកជូននៅសាលាបបឋមសិក្សាអូរជ្រៃ គឺជា ផ្នែកមួយជួយសម្រាលដល់ទុក្ខលំបាករបស់សិស្សានុសិស្ស ដែលកំពុងខ្វះខាតសម្ភារៈសិក្សា ខណៈសាលាមួយនេះ បានយកជង្រុកពោតធ្វើជាថ្នាក់រៀន។

Sabay-Donation-Ou-Chhrey-Primery-School(1)

ក្មេងស្រីពិការទាំងដៃ និង ជើង ជាអ្នកតំណាងទទួលសម្ភារៈពីលោក លី សុផាត ក្រុមការងារSabay

លោក ជីព ចិត្ត តំណាងក្រុមការងារ Sabay ដែលបានដឹកនាំយកអំណោយសប្បុរសធម៌បាននិយាយទៅកាន់សិស្សានុសិស្ស និង លោកគ្រូ អ្នកគ្រូ នាយកសាលា ក៏ដូចជា អាណាព្យាបាលដែលបានចូលរួមក្នុងពិធីប្រគល់សម្ភារៈសិក្សាមួយចំនួនជូនសិស្សសាលាអូរជ្រៃ និង សាលាប៊ូទូក ឲ្យដឹងថា ការនាំយកសម្ភារៈ និង ថវិកា មួយចំនួនមកនេះ គឺជា ផ្នែកនៃ កាយវិការរបស់សប្បុរសជនមកពីគ្រប់ទិសទី ដែលមានសន្ដានចិត្តនឹកអាណិតដល់ប្អូនៗ ដែលកំពុងសិក្សាហើយខ្វះខាតដោយយកជង្រុកពោតធ្វើជាថ្នាក់រៀន។

អ្នកស្រី កែម លីហៀង ផលិតករទូរទស្សន៍អាស៊ីអាគ្នេយ៍ ដែលនាំយកអំណោយប្រគល់ជូន មានជាសៀវភៅរឿងជិត ២០០ ក្បាល សៀវភៅ សរសេរ និង ខ្មៅដៃ តាមរយៈក្រុមការងារ Sabay បានថ្លែងថា សម្ភារៈទាំងអស់ គឺបានពីការចូលរួមបរិច្ចាគបន្ត ពីមិត្តភ័ក្ដិ ក្រោយពីមើលឃើញការលំបាករបស់កុមារតូចនៅសាលាអូរជ្រៃ និង សាលាប៊ូទូក។

អ្នកស្រីបន្ថែមថា ថ្វីត្បិតសម្ភារៈទាំងអស់នេះមិនច្រើន តែអ្នកស្រីសង្ឃឹមថា នឹងចូលរួមចំណែកជួយដល់កុមារតូចៗទាំងនោះ។ “មិនមែនមានតែកុមារនៅរាជធានីភ្នំពេញប៉ុន្មាននាក់ ដែលទទួលបានការអប់រំល្អ នឹងអាចក្លាយជាសសរទ្រូង ដើម្បីប្រទេសជាតិនោះទេ។ ប៉ុន្តែកុមារតូចៗ នៅតំបន់នោះ ក៏អាចក្លាយជាធនធានដើម្បីចូលរួម ដើម្បីអភិវឌ្ឍន៍ប្រទេសជាតិទៅថ្ងៃអនាគតដែរ”។

ទន្ទឹមគ្នានេះដែរ លោក រស់ គង់ តំណាងឲ្យអ្នកស្រី ជា ស៊ុនដាណែត នាយិកាវិទ្យុស្ត្រី FM 102 Mhz ដែលបាននាំយកថវិកា និង សម្ភារៈមួយចំនួនចូលរួមការងារសប្បុរសធម៌ជាមួយក្រុមការងារ គេហទំព័រ Sabay បាននិយាយថា រូបភាពមួយចំនួននៅសាលាអូរជ្រៃ និង ប៊ូទូក គឺនាំឲ្យលោកនឹកឃើញអតីតកាលរបស់ខ្លួន ដែលធ្លាប់សិក្សាសាលាបែបនេះកាលពីនៅតូចៗ។

ការទទួលបានការសិក្សាមានកម្រិតរួមទៅនឹងការបោះបង់ការ សិក្សានៅតំបន់ជនបទមានច្រើនមែនទែន។ ដូច្នេះអំណោយ ដែលបានផ្ដល់ជូនលោកសង្ឃឹមថា នឹងអាចជួយសម្រាលបន្ទុកការចំណាយរបស់អាណាព្យាបាលបានខ្លះ។ លោក រស់ គង់ និយាយបន្ថែម។

Ouchrey school (7)

ជុំវិញបញ្ហានេះដែរ លោក ជីព ចិត្ត ប្រធានក្រុមការងារ Sabay ទទួលអំណោយពីសប្បុរសជនបាននិយាយបន្ថែមថា អំណោយដែលក្រុមការងារ Sabay ទទួលបានរួមមាន ប្រាក់ ៨៤៤ ដុល្លារ និង ៦៥ម៉ឺន ៣៩០០ រៀល។ ចំពោះសម្ភារៈមានដូចជា៖ សៀវភៅសរសេរ ៣៩១ ក្បាល, សៀវភៅពុម្ព (រឿង) ជាង ១០០ ក្បាល, ប៊ិច ៧០២ ដើម និង ៤ ប្រអប់, ខ្មៅដៃ ៤៤៥ ដើម និង ១ ប្រអប់, បន្ទាត់ ៤១, ជ័រលុប ២៩០ ដុំ, ដែកខួង ១៥០, សាប៊ូ ១០០ ដុំ, ទឹកដោះជូរ ១១ កេះ, តង់ចំនួន ៣ និង សំលៀកបំពាក់មួយចំនួនទៀត។

Charity

រាប់ ពី ឆ្វេង លោក រស់ គង់ ជា តំណាង ប្រគល់ ថវិកា ជួយ ដល់ សិស្សានុសិស្ស អូរជ្រៃ តាម រយៈ លោក ជីព ចិត្ត ប្រធាន ក្រុម ការងារ Sabay ដែល បាន ដឹកនាំ អំណោយ ទៅ កាន់ សាលា អូរជ្រៃ និង ប៊ូទូក

ចំពោះថវិកា ៨៤៤ ដុល្លារ និង ៦៥ ម៉ឺន ៣៩០០ រៀល ដែលប្រមូលបានពីសប្បុរសជនពីគ្រប់ទិសទីនេះ មិនបានផ្ដល់ជូនដល់នាយកសាលានោះទេ គឺបានបង្វែរទៅឲ្យក្រុមហ៊ុន CBM ដែលរួមដំណើរសប្បុរសធម៌នេះ ដើម្បីទៅសិក្សាពីចំណុចខ្វះខាតហើយនឹងសម្រេចចិត្តធ្វើជាសាលា ឬ បំពេញចំណុចខ្វះខាតរបស់សាលាអូរជ្រៃ និង ប៊ូទូក។ យ៉ាងណាមិញ ទាំងថវិកា និងសម្ភារៈខាងលើ តំណាងក្រុមការងារSabay បានប្រកាសចំពោះមុខ សិស្សានុសិស្ស លោកគ្រូអ្នកគ្រូ អាជ្ញាធរ និងអាណាព្យាបាលក្នុងសហគមន៍នោះ។

“ខ្ញុំសម្រេចបង្វែរប្រាក់នេះ ទៅខាង CBM ដើម្បីបង្ហាញពីតម្លាភាព ព្រោះក្រុមហ៊ុននេះ គេនឹងធ្វើអ្វីមួយឲ្យចេញជារូបរាងតែម្ដង ប្រសិនបើយើងឲ្យទៅនាយកសាលា យើងអាចនិយាយបានថា វាអត់ទាន់ដឹងចេញអីជារូបរាងនៅឡើយ។ អញ្ចឹងក្រុមហ៊ុននេះ គេនឹងសិក្សាពីគម្រោងនានា ជាមួយ នាយកសាលា គេនឹងអាចធ្វើជាសាលា ឬ អណ្ដូងទឹក ឬ ធ្វើអ្វីផ្សេងដើម្បីបំពេញចំណុចខ្វះខាតនានា ដែលសិស្សានុសិស្ស ក៏ដូចជា សហគមន៍ ទាំងមូល កំពុងត្រូវការ”។ នេះជាការលើកឡើងរបស់ លោក ជីព ចិត្ត។

ទោះបីជាយ៉ាងណា លោក ពត សារឿន នាយកសាលាអូរជ្រៃ បានថ្លែងអំណរគុណចំពោះសប្បុរសជនដែលបាននាំយកសម្ភារៈចែកជូនដល់សិស្សានុសិស្ស ដែលសុទ្ធសឹងតែជាកុមារក្រីក្រ។ ទន្ទឹមនឹងនេះ លោកក៏បានអំពាវនាវឲ្យសប្បុរសជនជួយដល់ពួកគេបន្ថែមទៀត ព្រោះក្មេងៗនេះទីនេះ នៅមានការខ្វះខាតនៅឡើយ។ លោកនាយកសាលា បានបញ្ជាក់ដែរថា សិស្សានុសិស្សដែលកំពុងសិក្សានៅសាលា អូរជ្រៃ និង ប៊ូទូក សរុបចំនួនជិត ២០០ នាក់ ។

នាយកសាលាអូរជ្រៃ លោក ពត សារឿន បានអំពាវនាវឲ្យសប្បុរជនទាំងក្នុងនិងក្រៅប្រទេសជួយឧបត្ថម្ភបន្ថែមទៀតជូនសិស្សានុសិស្ស ក៏ដូចជា សហគមន៍ នៅក្នុងភូមិអូរជ្រៃ។ ការអំពាវនាវនេះធ្វើឡើងតាមរយៈវីដេអូខាងក្រោម៖

លោក ចាយ ម៉ោញ មេឃុំ បារាំងធ្លាក់ ស្រុកភ្នំព្រឹក ខេត្តបាត់ដំបង បាននិយាយថា ឃុំបារាំងធ្លាក់ មាន ១៣ ភូមិ ក្នុងនោះភូមិអូរជ្រៃ មានការលំបាក និង ខ្សត់ខ្សោយជាងគេ ព្រោះនៅឆ្ងាយពីទីប្រជុំជន។ ប្រជាពលរដ្ឋរស់នៅក្នុងឃុំបារាំងធ្លាក់ សរុបចំនួន ២០៥០ គ្រួសារ ក្នុងនោះ ភូមិអូរជ្រៃតែមួយ មានចំនួន ១៧៧ គ្រួសារ ដែលភាគច្រើនពួកគេប្រកបរបរកសិកម្ម ដើម្បីចិញ្ចឹមជីវិតប្រចាំថ្ងៃ៕

Sabay-Donation-Ou-Chhrey-Primery-School(3)

ក្រុម ការងារ Sabay កំពុង ផ្ទេរ សម្ភារៈ ដាក់ លើ គោយន្ដ ដើម្បី ដឹក ទៅ កាន់ សាលា អូរជ្រៃ និង ប៊ូទូក (ស្ថាន ភាព ផ្លូវ លំបាក ដូច្នេះ ត្រូវ ជិះ គោយន្ដ បន្ដ)

ផ្លូវ បែក ភក់ បន្ទាប់ ពី ភ្លៀង ធ្លាក់ មួយ មេ (ផ្លូវ លំបាក ជិត ៥ គីឡូម៉ែត្រ បាន ដល់ សាលា អូរជ្រៃ និង ប៊ូទូក)

Ouchrey school (6)