ឌី សូនីតា ផុងខ្លួនក្នុងឈុតក្តៅសាច់

ឌី សូនីតា ផុងខ្លួនក្នុងឈុតក្តៅសាច់

កញ្ញា ឌី សូនីតា តារាចម្រៀង និងសម្ដែងប្រាប់ថា នាងព្យាយាមគេចពីឈុតរោលរាលដោយការមិនទទួលថតខារ៉ាអូខេរហូតមក ប៉ុន្តែមកទល់ពេលនេះបានជ្រុលខ្លួនក្នុងឈុតនេះទាំងមិនដឹងខ្លួនមុនទៅហើយ ក្នុងខ្សែភាពយន្តខ្នាតធំ “Why” ដែលទើបដាក់បញ្ចាំងនៅរោងភាពយន្តធំៗថ្មីៗនេះ។

ឌី សូនីតា

កញ្ញា ឌី សូនីតា តារាចម្រៀង និងសម្ដែង

“ពេលទៅចុះឈ្មោះដំបូងគេឲ្យ នីតា ជាតួប្រពន្ធដើម ប៉ុន្តែដោយគេឃើញថា នីតា ពូកែយំ ម្យ៉ាងយើងអត់សមតួប្រពន្ធដើម ព្រោះយើងអត់ចំណាស់ គេដូរឲ្យធ្វើជាប្រពន្ធចុងវិញទាំងអត់ដឹងខ្លួន ទាល់តែគេឲ្យ Script មកបានដឹងថា តួយើងសាហាវ និងមានឈុតឱបថើបអីចឹង ហើយ នីតា ដាក់ចិត្តថា នឹងសម្ដែងឲ្យបាន”។

“Why” ជាភាពយន្តខ្នាតធំរបស់ផលិតកម្ម Rock ទើបបានសម្ពោធដាក់បញ្ចាំងកាលពីថ្ងៃទី៥ កញ្ញា ថ្មីៗនេះ។ក្រៅពីឈុតឆាករន្ធត់ព្រឺព្រួចជាច្រើនហើយ “ហេតុអ្វី” នៅមានឈុតឆាកស្នេហាក្ដៅសាច់មួយចំនួនដូចជា ឈុតស្នេហាលើគ្រែរវាងកញ្ញា ឌី សូនីតា ជាមួយតួឯកប្រុសលោក សូត្រ វិទូ។ តារាមានកំណើតនៅទឹកដីខេត្តកំពង់ឆ្នាំងរូបនេះ ប្រាប់ថានាងសម្ដែងខុសជាច្រើន ដោយសារមិនធ្លាប់។

“នីតាធ្វើខុសដល់ទី២០ដងបង ធម្មតាខុសយ៉ាងច្រើនត្រឹម ២-៣ដងអីទេ តែនេះដល់ទៅ២០ដង នីតា តូចចិត្តណាស់ ហើយយំ និងសួរខ្លួនឯងថា ហេតុអ្វីសម្ដែងឈុតហ្នឹងអត់កើត ដល់ថ្នាក់អ្នកដឹកនាំដើរមកធ្វើសតិអារម្មណ៍ គាត់ថា សិល្បៈគឺអីចឹង បើយើងលេងដល់នោះគឺយើងខ្លួនយើង”។

ក្រោយបានការពន្យល់ពីអ្នកដឹកនាំ ឌី សូនីតា បានដាក់ចិត្តចូលតួរហូតសម្ដែងបានសម្រេច។ “នីតា សង្ឃឹមថា រឿងនេះជោគជ័យ ព្រោះ នីតា សម្ដែងចេញអស់ពីក្នុងខ្លួនប្រហែល ៧០% ឯណោះ សង្ឃឹមថាពុកម៉ែបងប្អូនជួយគាំទ្រ”។

ឌី សូនីតា លោក សូត្រ វិទូ

កញ្ញា ឌី សូនីតា និងតួសម្ដែងក្នុងរឿង “Why”

កញ្ញា ឌី សូនីតា មុនវិវត្តន៍ខ្លួនមកជាតារាសម្ដែង នាងគឺជាតារាចម្រៀងរបស់ផលិតកម្មហនុមាន។ នាងត្រូវបានគេស្គាល់ច្រើនក្រោយសម្ដែងរឿងភាគរបស់កម្មវិធី “ឡូយ៩” ពិសេសគឺរឿង “ជីវិតនាងរក្សា”។ សូនីតា ថ្លែងថា “បន្ទាប់ពីរឿង “ជីវិតនាងរក្សា” ហ្នឹងមក គឺមានគេស្គាល់ច្រើន ហើយមានរឿងគេទាក់ទងច្រើនមែនទែន។ ក្រៅពីហ្នឹង មានរឿង “គំនុំស្នេហ៍ចាស់” ក៏គេស្គាល់ច្រើនដែរ”។

បន្ទាប់រឿង “ហេតុអ្វី?” ឌី សូនីតា ទើបបញ្ចប់ការថតរឿងភាគមួយរឿងទៀតមានចំណងជើងថា “និស្ស័យស្នេហ៍ខ្ញុំ”។ តារារូបនេះ ប្រាប់ថា បន្តពីនេះ កញ្ញា សុំសម្រាកបន្តិចសិន។ “នាងខ្ញុំហត់ខ្លាំងពេក គឺយើងអត់មានពេលអ្វីជារបស់ខ្លួនឯង និងគ្រួសារសោះ គឺបាត់ទាំងអស់ ព្រោះយើងសម្រុកថតឡើង៣-៤រឿងជាប់ៗគ្នា អីចឹងទេសុំសម្រាកសិន ចាំដើមឆ្នាំក្រោយចាំគិតគូរឡើងវិញ”៕

ប្រភព: Sabay

មុន បន្ទាប់

មតិយោបល់