ប្រញាប់ឡើង!គន្លឹះសំខាន់ៗពីវាគ្មិនល្បីៗកំពុងរង់ចាំប្រឹក្សាយោបល់ដោយសេរី

ប្រញាប់ឡើង!គន្លឹះសំខាន់ៗពីវាគ្មិនល្បីៗកំពុងរង់ចាំប្រឹក្សាយោបល់ដោយសេរី

ថ្ងៃទី៦ ខែកញ្ញាព្រឹកមិញនេះមានការរៀបចំពិព័រណ៍ការងារប្រចាំឆ្នាំដ៏សំខាន់មួយ ក្រោមការចូលរួមរបស់វាគ្មិនកិត្តិយសល្បីៗមកពីបណ្ដាក្រុមហ៊ុន និងអង្គការធំជាច្រើនទៀត ដែលពួកគាត់នឹងចូលខ្លួនមកធ្វើបទបង្ហាញ និងចែករំលែកបទពិសោធន៍ ជូនដល់និស្សិតមកពីគ្រប់សាកលវិទ្យាល័យ និងបុគ្គលិកមកពីបណ្ដាក្រុមហ៊ុននានា។
ពិព័រណ៍ដ៏កម្រនេះ ជាការរៀបចំឡើងលើកដំបូងរបស់អង្គការប៉ាសឺរែលនុយមេរិកកម្ពុជា ក្នុងឱកាសដែលអង្គការធ្វើការចែកសញ្ញាបត្រដល់និស្សិតបញ្ចប់ការសិក្សានៅទីនោះ ចំនួន៩៥នាក់។ ទន្ទឹមគ្នានេះដែរ ក៏មានក្រុមហ៊ុន និងអង្គការប្រមាណចំនួន២០ស្ថាប័នទៀត បានដាក់តាំងបង្ហាញពីឱកាសការងារ ផលិតផល និងសេវាកម្មរបស់ខ្លួនទៀតផង។

វាគ្មិនទាំងអស់ពួកគាត់នឹងរង់ចាំផ្ដល់ការប្រឹក្សាយោបល់ដល់ភ្ញៀវដែលចូលរួមទាំងអស់ពីគន្លឹះសំខាន់ៗ ជុំវិញប្រធានបទនានា ដូចជាការអភិវឌ្ឍន៍ជំនាញ ការរៀបចំខ្លួនរបស់យុវវ័យដើម្បីសមាហរណកម្មអាស៊ាន របៀបក្លាយជាបុគ្គលជោគជ័យ ការត្រៀមផ្លាស់ប្ដូរខ្លួនពីនិស្សិតទៅជានិយោជិក និងប្រធានបទដទៃទៀត។

ថ្លែងនៅក្នុងពិធីបើកឲ្យដំណើរការពិព័រណ៍ការងារនេះ លោក ជី សិលា នាយកប្រតិបត្តិក្រុមហ៊ុន Sabay Digital Corporation Ltd បានចែករំលែកថា៖ “ការតស៊ូ និងប្រឹងប្រែង គឺជាអ្វីដែលមនុស្សម្នាក់ៗមាន ដោយមិនបាច់ចំណាយលុយស្វែងរក”។ លោកបានបន្ថែមទៀតថា ដូច្នេះហើយនេះជាពិព័រណ៍មួយដ៏មានសារៈសំខាន់ណាស់ក្នុងការផ្ដល់ ឱកាសជូននិស្សិត និងបុគ្គលិកនានា អាចជួបជាមួយវាគ្មិនជំនាញៗទាំងនោះ។

វាគ្មិនល្បីៗនៅក្នុងពិព័រណ៍

ប្រញាប់ឡើង! វាគ្មិនល្បីៗមានប្រធានអង្គការ នាយកប្រតិបត្តិក្រុមហ៊ុន អ្នកជំនាញសង្គម អ្នកគ្រប់គ្រងទូទៅ និងអ្នកជំនាញតាមស្ថាប័នធំៗជាច្រើនទៀតកំពុងរងចាំស្វាគមន៍ប្រឹក្សាយោបល់ជូនប្រិយមិត្តនៅទីនោះ។

ពិព័រណ៍ដែលចូលរួមដោយសេរីនេះ ធ្វើឡើងរយៈពេលមួយថ្ងៃពេញ នៅក្នុងបរិវេណរបស់អង្គការប៉ាសឺរែល នុយមេរិកកម្ពុជា មានទីតាំងនៅភូមិត្រពាំងឈូក (បុរីសរឡា) សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ព័ត៌មានបន្ថែមអាចទំនាក់ទំនងតាមទូរស័ព្ទ 097 9 877 977 ៕

ប្រភព: Sabay

មុន បន្ទាប់

មតិយោបល់