ឈិនឡុង ចាប់ផ្ដើមថតរឿងថ្មី ក្រោយព័ត៌មានអាស្រូវកូនប្រុស

ឈិនឡុង ចាប់ផ្ដើមថតរឿងថ្មី ក្រោយព័ត៌មានអាស្រូវកូនប្រុស

បន្ទាប់ពីបាត់មុខមួយរយៈដោយសារព័ត៌មានកូនប្រុសត្រូវប៉ូលិសចាប់ខ្លួនដោយសារគ្រឿងញៀន ថ្មីៗនេះ កំពូលតារាសម្ដែងហុងកុង Jackie Chan (ឈិនឡុង) បានត្រលប់ចូលថតរឿងជាធម្មតាវិញហើយ។

jackie-chan-1

សារព័ត៌មាន Mingpao News បានឲ្យដឹងថា ឈិនឡុង បានបង្ហាញមុខជាថ្មីនៅទីតាំងថតរឿង ក្នុងខេត្ត Hebei កាលពីថ្ងៃទី២ ខែកញ្ញា ដើម្បីត្រៀមថតរឿងថ្មីមួយគឺរឿង “Skiptrace” ដែលមានតារាស្រីល្បីឈ្មោះ Fan Bingbing ជាតួឯកស្រី នៅថ្ងៃទី៦ ខែកញ្ញា ខាងមុខនេះ។

បើទោះជាតារាក្បាច់គុនវ័យ ៦០ឆ្នាំរូបនេះមិនបាននិយាយអ្វីជាមួយអ្នកសារព័ត៌មាន ប៉ុន្តែមិត្តភ័ក្ដិរបស់គេគឺតារាសម្ដែង Eric Tsang បានបង្ហើបថា Jackie Chan សុខសប្បាយធម្មតាទេឥលូវនេះ បើទោះជាគេមិនទាន់បានជួបមុខកូនប្រុសផ្ទាល់ និងបានត្រឹមតែផ្ញើសារឆ្លើយឆ្លងតាមរយៈក្រុមសមត្ថកិច្ចក្ដី។

Eric បាននិយាយថា “ខ្ញុំមិនហ៊ានទូរស័ព្ទទៅគាត់ ប៉ុន្តែគាត់បានផ្ញើសារមកខ្ញុំថា មិនចាំបាច់បារម្ភពីគាត់នោះទេ”។
តារាសម្ដែងរូបនេះបាននិយាយថែមទៀតថា បើទោះជា ឈិនឡុង អាចប្រឈមមុខនឹងបញ្ហានេះធម្មតាក្ដី ប៉ុន្តែប្រពន្ធរបស់គាត់គឺនៅតែតក់ស្លុត និងពិបាកចិត្តខ្លាំងនៅឡើយដោយសារតែរឿងនេះ។

កូនប្រុសអាយុ៣១ឆ្នាំរបស់ ឈិនឡុង ឈ្មោះ Jayee Chan ដែលជាតារាសម្ដែង និងចម្រៀងដូចជាឪពុករបស់គេដែរ ត្រូវបានប៉ូលិសឃុំខ្លួនកាលពីពីរសប្ដាហ៍មុន និងអាចប្រឈមមុខនឹងការជាប់ពន្ធនាគាររយៈពេល ៣ឆ្នាំ បន្ទាប់ពីរកឃើញថ្នាំញៀន (កញ្ឆា) ចំនួន ១០០ក្រាម ក្នុងផ្ទះរបស់គេនៅទីក្រុងប៉េកាំង ប្រ៕

ប្រភព: Sabay

មុន បន្ទាប់

មតិយោបល់