ស្ងាត់ចម្រៀងលើទីផ្សារជិតកន្លះឆ្នាំ ណាំ ប៊ុណ្ណារ័ត្ន មិនច្បាស់ទ្រនំនៅ Town

ស្ងាត់ចម្រៀងលើទីផ្សារជិតកន្លះឆ្នាំ ណាំ ប៊ុណ្ណារ័ត្ន មិនច្បាស់ទ្រនំនៅ Town

លោក ណាំ ប៊ុណ្ណារ័ត្ន និយាយថា អនាគតក្នុងទ្រនំ Town មិនច្បាស់លាស់ទេ បន្ទាប់ពីជិតកន្លះឆ្នាំចុងក្រោយនេះ មិនមានបទចម្រៀងចេញលក់លើទីផ្សារដូចតារាដទៃ។

អ្នកនិពន្ធបទភ្លេង និង ជាតារាចម្រៀងលោក ណាំ ប៊ុណ្ណារ័ត្ន លើកឡើងថា៖ “រឿងបន្ត ឬនៅមិនទាន់ច្បាស់ទេ ព្រោះយើងនៅពិភាក្សាគ្នាពេលក្រោយទៀត តែសម្រាប់បទចម្រៀងខ្ញុំហាក់ស្ងាត់ណាស់ជាងកន្លះឆ្នាំហើយ”។

អានអត្ថបទ៖ តារាចម្រៀងល្បីៗ១០ដួងប្ដូរទ្រនំញឹកញាប់ មុនពេលឈរជើងនឹង

nam bunnaroth

លោកបានអះអាងថា មិនមានទំនាស់ ឬបញ្ហាអសកម្មអ្វីជាមួយផលិតកម្ម Town ឡើយ។ ការស្នាក់នៅបន្តជាមួយផលិតកម្ម ឬត្រូវចាកចេញនាពេលខាងមុខអាស្រ័យលើការនិយាយគ្នា ព្រោះខ្លួនក៏មិនមែនជាតារាចម្រៀងជាប់កុងត្រាដូចតារាផ្សេងទៀតទេ។

មូលហេតុពិតប្រាកដ នៃភាពស្ងប់ស្ងាត់ចម្រៀងលើទីផ្សារមិនត្រូវបានម្ចាស់ពាន អាណាចក្រតារាផ្នែកតារាចម្រៀងមានសក្ដានុពលបង្ហើបឱ្យដឹងនោះទេ ដោយលោកនិយាយថាកំពុងជាប់រវល់ប្រជុំ។

ដោយឡែកអ្នកចាត់ការទូទៅក្នុងផលិតកម្ម Town លោក មាស សុខរតនៈ ក៏បាននិយាយដែរថា ផលិតកម្ម និង តារាចម្រៀង ណាំ ប៊ុណ្ណារ័ត្ន គឺមិនដែលមានបញ្ហាអ្វីជាមួយគ្នានោះទេ ហើយការសម្រេចចាកចេញ ឬបន្តស្នាក់នៅអាស្រ័យលើបុគ្គល។

លោកបញ្ជាក់ដូច្នេះថា៖ “គាត់ទៅ ឬអត់យើងមិនអាចហាមឃាត់បានទេអូន ព្រោះជាសិទ្ធិរបស់គាត់ តែបងគ្រាន់តែបញ្ជាក់ឱ្យច្បាស់ថាយើងគ្មានបញ្ហាអ្វីនឹងគ្នាទេ”។

លោក មាស សុខរតនៈ ទទួលស្គាល់ថា មួយរយៈចុងក្រោយបទចម្រៀងរបស់តារាចម្រៀងរូបនេះលើទីផ្សារពិតជាស្ងប់ស្ងាត់ពិតមែន ក៏ប៉ុន្តែលោកបានអះអាងថា ផលិតកម្មកំពុងត្រៀមធ្វើបទជាច្រើនសម្រាប់តារាចម្រៀងខាងលើ។

លោក ណាំ ប៊ុណ្ណារ័ត្ន ទើបត្រឡប់មកពីការសម្ដែងនៅ អាមេរិក ជាមួយ កញ្ញា លី អ៊ីវ៉ាធីណា កាលពីពេលថ្មីៗ ដោយទទួលបានការចាប់អារម្មណ៍ជាច្រើនពីបងប្អូនខ្មែរនៅទីនោះ។ ក្រៅតែពីតារាចម្រៀងលោកត្រូវមហាជនទទួលស្គាល់ថាជាអ្នកនិពន្ធបទភ្លេងល្បីឈ្មោះម្នាក់ រហូតបានក្លាយជាជយលាភី ផ្នែកតារាចម្រៀងមានសក្ដានុពលពីកម្មវិធីអាណាចក្រតារាកាលពីឆ្នាំ ២០១២ កន្លងទៅ៕

ប្រភព: Sabay

មុន បន្ទាប់

មតិយោបល់