ពែក មី លាតត្រដាងជីវិតពិតតាមបទ “ជីវិតអ្នកកំប្លែង”

ពែក មី លាតត្រដាងជីវិតពិតតាមបទ “ជីវិតអ្នកកំប្លែង”

តារាកំប្លែងដែលកំពុងទទួលបានការគាំទ្រច្រើន ពីទស្សនិកជន នាយ ពែក មី បានលាតត្រដាងពីជីវិតពិតតាមរយៈបទ “ជីវិតអ្នកកំប្លែង”។ នាយ បានបកស្រាយបទចម្រៀងនេះ នៅលើកញ្ចក់ទូរទស្សន៍ ដែលបានរៀបរាប់ពីជីវិតតស៊ូក្រៅឆាករហូតបានក្លាយជាតារាកំប្លែងល្បីនាពេលបច្ចុប្បន្ននេះ។

សូមចុចអាន៖ ទឹកចិត្តបងធម៌ធំធេងពេក ពែកមី អួលដើមក

ពាក់-មី-3

“ជាអ្នកកំប្លែងទឹកភ្នែកម្នាក់ឯងគ្មានអ្នកណាដឹង រឿងក្រៅឆាកលំបាកខំប្រឹង មុនមានថ្ងៃហ្នឹងជីវិតយ៉ាងណា?” ។ នេះជាឃ្លាមួយនៅក្នុងបទ “ជីវិតអ្នកកំប្លែង” ដែលសរសេរទំនុកច្រៀងដោយ នាយ ពែក មី ផ្ទាល់ ហើយក៏ជាជីវិតរបស់លោកផ្ទាល់ផងដែរ។

នាយ ពែក មី គឺជា តារាកំប្លែងមួយរូប ដែលអាចកសាងភាពល្បីល្បាញក្នុងពិភពសិល្បៈក្នុងរយៈពេលដ៏ខ្លី។ ពីការងារសំណង់ ទាហាន ហើយក្លាយជាអ្នកកំប្លែង តារាចម្រៀង និង ចេះនិពន្ធបទចម្រៀងដោយខ្លួនឯងថែមទៀត។

ដូច្នេះហើយ នាយ ពែក មី ក៏បានរៀបរាប់ពីជីវិតលំបាករបស់ខ្លួន ទម្រាំបានឈានដល់ជោគជ័យសព្វថ្ងៃដោយបានរំលេចនៅក្នុងបទ “ជីវិតអ្នកកំប្លែង”។ “មកដល់ទីក្រុង ធ្វើការសំណង់ញើសដូរបាយហូប ឃ្លាននំចំណី កីមិនហ៊ានចាយ សន្សំប្រាក់ឲ្យម្ដាយដោះស្រាយបញ្ហា”។ ឃ្លានេះនៅក្នុងបទចម្រៀងរបស់ នាយ ពែក មី។

ជាការពិតនាយ ពែក បានចាកចេញពីស្រុកកំណើតនៅឯខេត្តស្វាយរៀង មកកាន់រាជធានីភ្នំពេញ ដោយមានតែបង្វិចខោ អាវ បីបួនកំប្លេរ និង មានប្រាក់តែ ៤-៥ ម៉ឺនរៀលសម្រាប់ធ្វើសោហ៊ុយតាមផ្លូវប៉ុណ្ណោះ។ មកដល់ភ្នំពេញលើកដំបូង ការងារដែលនាយចាប់ផ្ដើមធ្វើ គឺជាការងារសំណង់ដោយទទួលបានប្រាក់កម្រៃតិចតួចបំផុត ដែលតម្រូវឲ្យអត់ធ្មត់ក្នុងការចាយវាយត្បឹតត្បៀតដើម្បីសន្សំប្រាក់ជួយផ្គត់ផ្គង់គ្រួសារក្នុងនាមលោកជាកូនច្បងក្នុងចំណោមបងប្អូនប្រុស-ស្រី ៧ នាក់។

នាយ ពែក មី បានផ្លាស់ប្ដូរជីវិតដ៏កម្សត់របស់ខ្លួនបន្ទាប់ពីចូលរួមប្រឡងនៅក្នុងកម្មវិធី “មហាកំប្លែង” របស់ស្ថានីយទូរទស្សន៍ CTN កាលពីអំឡុងឆ្នាំ ២០០៩។ ដោយទេពកោសល្យដ៏ប៉ិនប្រសព្វនេះ នាយ ពែកមី បានជាប់ជា តារាកំប្លែង ហើយបានក្លាយជាអ្នកកំប្លែងប្រចាំស្ថានីយទូរទស្សន៍មួយនេះ រហូតបានក្លាយជាប្រធានក្រុមកំប្លែង CTN។

ប្រភព: Sabay

ដូច្នេះហើយ នាយ ពែក មី បានបញ្ចូលរឿងរ៉ាវ ពេលចូលសិល្បៈលើកដំបូងនៅក្នុងបទចម្រៀងដោយនាយបានសរសេររៀបរាប់ថា “ទូរទស្សន៍រើសអ្នកកំប្លែងដាក់ពាក្យម្នាក់ឯង សម្ដែងមុខគណៈកម្មការ ទឹកដោះម៉ែថ្លៃ កូនមាននិស្ស័យក្លាយជាតារា ម៉ែអរពេកហូរទឹកនេត្រា សង្ឃឹមគ្រួសាររួចពីក្រក្រី”។

ទំនុកច្រៀងទាំងស្រុងគឺជា ការនិពន្ធដោយផ្ទាល់ដៃរបស់ នាយ ពែកមី ប៉ុន្ដែសាច់ភ្លេងគឺយកលំនាំបទរបស់ថៃ។ នាយ ពែកមី បានប្រាប់គេហទំព័រ Sabay ថា តាមពិតទៅលោកនិពន្ធបទនេះឡើង ដើម្បីបង្ហាញពីជីវិតតស៊ូរបស់លោក ដែលការណ៍ច្រៀងរៀបរាប់ពីជីវិតពិតនេះ គឺនៅគ្រាដែលឪពុកម្ដាយរបស់ឡើងកម្មវិធីរបស់ស្ថានីយទូរទស្សន៍ CTN។

ប៉ុន្តែ ដោយសារមានការគាំទ្រ បទចម្រៀង “ជីវិតអ្នកកំប្លែង” នេះ ត្រូវបានផលិតកម្ម Town យកទៅបញ្ចូលនៅក្នុងវ៉ុលចម្រៀងដែលត្រៀមចេញនៅក្នុងពេលឆាប់ៗនេះដែរ។

ប្រសិនបើទឹកប៊ិចដែលរំលេចពីប្រវត្តិរបស់នាយពែកមី មានការគាំទ្រ ពីស្នាដៃនិពន្ធរបស់នាយ គឺពែកមី បានប្ដេជ្ញាថា នាយនឹងចាប់អាជីពមួយទៀតគឺជាអ្នកនិពន្ធទំនុកច្រៀង និពន្ធរឿង ដឹកនាំរឿង ដែលជាអាជីពបន្ថែមលើអាជីពកំប្លែង និង ច្រៀង៕

មុន បន្ទាប់

មតិយោបល់