Rock ក្រុងពាលីរឿងដែលគាំទ្រដោយក្រសួងសាធារណការ

Rock ក្រុងពាលីរឿងដែលគាំទ្រដោយក្រសួងសាធារណការ

ផលិតកម្ម Rock ដែលកំពុងសម្រុកផលិតរឿងជាច្រើនក្នុងរយៈពេលប្រមាណ១ឆ្នាំចុងក្រោយនេះ បានសហការជាក្រសួងសាធារណការ និងដឹកជញ្ជូនផលិតខ្សែភាពយន្តភាគថ្មីមួយរឿងទៀតមានចំណងជើងថា “កំហុសអ្នកណា” ដែលមានទិសដៅបញ្ជ្រាបការយល់ដឹងលើបញ្ហាសង្គមមួយចំនួន។

កំហុសអ្នកណា

តួសម្ដែងក្នុងរឿង “កំហុសអ្នកណា”

លោក ហង្ស វណ្ណា អ្នកនិពន្ធ និងដឹកនាំថតខ្សែភាពយន្តខាងលើ ថ្លែងថា “វាជារឿងប្រភេទអប់រំសង្គម ផ្ដោតលើបញ្ហាមួយចំនួនដូចជាចរាចរណ៍ ស្នេហាយុវវ័យ និងការធ្វើចំណាកស្រុកទៅធ្វើការនៅប្រទេសជិតខាងជាដើម។ នៅមានច្រើនទៀត ព្រោះយើងបានធ្វើតាំងពីឆ្នាំ ២០១២ ក្រោយមកស្រុកយើងមានហេតុការណ៍ពិសេសៗជាច្រើន ដូចជាបញ្ហាព្រំដែនជាដើម យើងក៏បានដាក់បញ្ចូលក្នុងភាពយន្តនេះទាំងអស់!”។

“កំហុសអ្នកណា” មានដំណើរផ្ដើមចេញពីក្រុមក្មេងស្ទាវមួយក្រុមក្នុងនោះ ក៏មានតួឯកស្រីម្នាក់ដែរឈ្មោះ “លីនដា” សម្ដែងដោយកញ្ញា ប៊ុត ស្រីម៉ី។ លីនដា គឺកូនជាអ្នកមាន ហើយនាងតែងធ្វើអ្វីៗតាមទំនើងចិត្តមិនស្ដាប់ដំបូន្មានរបស់ឪពុកម្ដាយឡើយ ធ្វើឲ្យនាងជ្រុលខ្លួនធ្លាក់ក្នុងរឿងមិនល្អមួយចំនួន។

កំហុសអ្នកណា

យ៉ាងណា បន្តិចម្ដងៗនាងត្រូវបានតម្រែតម្រង់ទិសដោយតួប្រុសឈ្មោះ “យុទ្ធា” សម្ដែងលោក ឌីម ឧត្តម តារាម៉ូដែលក្នុងក្រុម Sun Model ដែលចរិតហ្នឹងហ្ន៎ ម៉ត់ចត់ និងត្រឹមត្រូវ។ នេះបើតាមលោក រចនា ដួង អ្នកសហការដឹកនាំជាមួយលោក ហង្ស វណ្ណារ៉ា បញ្ចេញឲ្យដឹង។

“តួប្រុស និងតួស្រីកាច់កុងគ្នាខ្លាំងណាស់ មុនត្រូវរ៉ូវគ្នា។ មិនមែនមានតែប៉ុណ្ណឹងទេ នៅមានរសជាតិជាច្រើនទៀត បើទោះរឿងនេះនិយាយពីចរាចរណ៍មែន ប៉ុន្តែយើងបានបញ្ចូលពីជ្រុងបងតូចបងធំ និងគ្រឿងញៀន ស្នេហាយុវវ័យអីច្រើនទៀត ធ្វើឲ្យអ្នកទស្សនាទទួលបានច្រើនសារ។ បើមិនអីចឹងទេ អ្នកមើលគាត់ស្រែកមិនខាន!”។ លោក រចនា ដួង បន្ថែម។

ដោយមានកិច្ចសហការពីក្រសួងសាធារណការ តួឯកស្រីក្នុងរឿងនេះ គឺកញ្ញា ប៉ុត ស្រីម៉ី វ័យ ២២ឆ្នាំ ត្រូវបានរើសផ្ទាល់ដោយសាមីក្រសួងនេះ។ លោក រចនា ដួង ប្រាប់ថា ” ស្រីម៉ី ក្រសួងជាអ្នកបញ្ជូនមក ព្រោះគាត់ធ្លាប់សម្ដែងក្នុងស្ប៉តរបស់ក្រសួងជាច្រើន ប៉ុន្តែក៏បានការឯកភាពពីខាងយើងដែរ។ គាត់មានទេពកោសល្យល្អ”។

អត្ថបទ ៖ “សាកលវិទ្យាល័យកំណើតស្នេហ៍” សម្ដែងដោយតារាវ័យក្មេងស្អាតៗក្រុងពាលីព្រឹកមិញ

វិលមកសាមីខ្លួនវិញ កញ្ញា ប៊ុត ស្រីម៉ី ដែលប្រឡូកសិល្បៈក្នុងឆ្នាំ ២០១២ បានថ្លែងថា “ខ្ញុំសប្បាយចិត្តមែនទែនបានសម្ដែងរឿងនេះ…តាមពិតទៅខ្ញុំប្រុងឈប់ពីសិល្បៈទៅហើយ ម៉ាក់ខ្ញុំចង់ឲ្យរកស៊ី។ តែដោយសាររឿងនេះល្អ ផ្ដល់ការអប់រំដល់សង្គម ផ្សំនឹងខ្ញុំបានសម្ដែងជាតួឯកលើកដំបូងផង ខ្ញុំក៏សម្រេចថាសម្ដែងទៅ ខ្ញុំនឹងប្រឹងសម្ដែងឲ្យបានល្អ!”។

កំហុសអ្នកណា

ថ្នាក់ដឹកនាំផលិតកម្ម Rock ក្នុងពិធីក្រុងពាលីព្រឹកមិញ

លោក ឌីម ឧត្តម តារាម៉ូដែលដែលទើបទទួលជយលាភី “Skin Award” ក្នុងកម្មវិធី “Asia New Star Model Contest 2013″ ពីប្រទេសកូរ៉េ បានប្រាប់ថា លោកក៏រីករាយដូចគ្នាដែលបានមានចំណែកក្នុងរឿងមួយដែលមានផ្ដោតលើការអប់រំនេះ។

បន្ទាប់ពីធ្វើពិធីក្រុងពាលីព្រឹកមិញ “កំហុសអ្នកណា” នឹងចេញថតផ្លូវការនៅថ្ងៃទី ១២កញ្ញា នេះ មុនយកដាក់បញ្ចាំងនៅលើកញ្ចក់ទូរទស្សន៍ CTN ក្នុងអំឡុងខែ១០ ក្រោយថតចប់។ តាមលោក ហង្ស វណ្ណារ៉ា អ្នកនិពន្ធ និងដឹកនាំរឿងជើងចាស់ ប្រាប់ថា រឿងនេះ អាចនឹងដាក់បញ្ចាំងនៅគ្រប់ស្ថានីយទូរទស្សន៍ថែមទៀត៕

កំហុសអ្នកណា