តារាចម្រៀងពិការភ្នែក ប្រុក ចាន់ថន មានទីផ្សារបណ្ដើរៗ!

តារាចម្រៀងពិការភ្នែក ប្រុក ចាន់ថន មានទីផ្សារបណ្ដើរៗ!

ស្របពេលដែលបទចម្រៀង “ពិការកាយ មិនពិការចិត្ត” កំពុងត្រៀមចេញជាផ្លូវការក្នុងអាល់ប៊ុមដំបូង នៃផលិតកម្ម BKS ពេលនេះ យុវជនពិការភ្នែក ប្រុក ចាន់ថន ត្រូវបានម្ចាស់ក្រុមហ៊ុនផលិតឱសថមួយ ទាក់ទងឲ្យទៅថតចម្រៀងផ្សព្វផ្សាយពីផលិតផលរបស់ពូកគេទៀតផង។ យុវជនរូបនេះ ចាប់ផ្ដើមបោះជំហានទៅមុខបណ្ដើរៗហើយ។

ចាន់ថន ប្រាប់ថា ខាងក្រុមហ៊ុនផលិតឱសថគីណាល់ បានទាក់ទងមកម្ចាស់ផលិតកម្ម BKS ដោយប្រាប់ថា ពេញចិត្តចំពោះសំឡេងរបស់គេ និង ចង់ឲ្យថតជាបទចម្រៀងសម្រាប់បញ្ចូលក្នុងស្ប៉តផ្សព្វផ្សាយពាណិជ្ជកម្ម ពីផលិតផលខាងលើ ដែលជាការជួយសម្រួលដល់ជីវភាព រស់នៅរបស់យុវជនរូបនេះផងដែរ។

អានអត្ថបទ៖ យុវជនពិការភ្នែកជ្រុះពីកម្មវិធី The Voice Cambodia ចេញបទនៅផលិតកម្មBKS

ចាន់ថន ប្រាប់ Sabay ថា៖ “ ខាងក្រុមហ៊ុនមិនបានទាក់ទងមកខ្ញុំដោយផ្ទាល់ទេ ប៉ុន្តែគាត់បានទាក់ទងទៅខាងផលិតកម្មរួចរាល់ហើយ រង់ចាំតែពេលវេលាឡើងមកភ្នំពេញម្ដងទៀត ដើម្បីថតប៉ុណ្ណោះ”។ អតីតបេក្ខភាពធ្លាក់ក្នុងជុំទី ១ នៃកម្មវិធី The Voice Cambodia រូបនេះ បានបន្ថែមថា ដោយសារតែខ្លួនពិការភ្នែកមិនអាចមើលឃើញ ដូច្នេះរាល់ការសម្រេចចិត្តទាំងឡាយ ផ្អែកលើភាគីម្ចាស់ផលិតកម្មទាំងស្រុង។

ទោះបីជាបរាជ័យ នៅក្នុងការប្រលងចម្រៀង The Voice Cambodia ក៏ពិតមែនប៉ុន្តែ ចាន់ថន ត្រូវបានគេមើលឃើញថា នៅមានសំណាងជាងបេក្ខភាពជម្រុះផ្សេងទៀត ព្រោះរូបគេមានឱកាសក្លាយជាតារាចម្រៀងក្នុងផលិតកម្ម BKS ភ្លាមៗ។ ជាមួយគ្នានោះ ម្ចាស់ផលិតកម្មខាងលើ ក៏បានណែនាំឲ្យយុវជនម្នាក់នេះ បានឡើងច្រៀងតាមកម្មវិធីប្រគំតន្ត្រីកន្លងមក ដើម្បីបានកម្រៃខ្លះសម្រាប់ផ្គត់ផ្គង់ជីវភាពរស់នៅ ខណៈដែលសប្បុរសជនទាំងក្នុង និងក្រៅប្រទេសក៏ឧបត្ថម្ភជាថវិកាមួយចំនួនផងដែរ។

ប្រភព: sabay

មុន បន្ទាប់

មតិយោបល់