អេបូឡាបន្តផ្ដាច់ជីវិតមនុស្សដល់ជិត២០០០នាក់ហើយ

អេបូឡាបន្តផ្ដាច់ជីវិតមនុស្សដល់ជិត២០០០នាក់ហើយ

អង្គការសុខភាពពិភពលោក (WHO) បានប្រកាសថាមនុស្សជាង ១៩០០នាក់ហើយដែលបានបាត់បង់ជីវិតដោយមេរោគអេបូឡា បន្ទាប់ពីមានការរីករាលដាលនៅអាហ្វ្រិកខាងលិច។

ប្រធាន WHO លោកស្រី Margaret Chan បាននិយាយថាអ្នកឆ្លងមេរោគអេបូឡាអាចនឹងមានដល់ទៅ ៣៥០០ ករណីទៀត នៅប្រទេសហ្គីណេ សេរ៉ាឡេអូន និងលីបេរីយ៉ា។ នៅថ្ងៃព្រហស្បតិ៍នេះ WHO នឹងបើកកិច្ចប្រជុំ ដើម្បីពិនិត្យឡើងវិញចំពោះការព្យាបាល ពិភាក្សាលើការពន្លឿនការធ្វើតេស្ត និងការផលិតសេរ៉ូមព្យាបាលអេបូឡា។ អ្នកជំនាញផ្នែកជំងឺ អ្នកស្រាវជ្រាវឱសថ មន្ត្រីពីប្រទេសរងគ្រោះនានា និងអ្នកជំនាញផ្នែកឱសថ នឹងធ្វើបទបង្ហាញនៅក្នុងអង្គប្រជុំនាទីក្រុងហ្សឺណែវ។

WHO ធ្លាប់ប្រកាសអាសន្នថា មនុស្សជាង ២ ម៉ឺននាក់ អាចនឹងឆ្លងមេរោគកំណាចមួយនេះ មុនពេលអ្នកស្រាវជ្រាវអាចគ្រប់គ្រងការរីករាលដាលបាន។ លោកស្រី Chan បានរៀបរាប់ថា “ការផ្ទុះឡើងនៃអេបូឡាលើកនេះ គឺមានភាពធ្ងន់ធ្ងរ និងស្មុគស្មាញបំផុតមិនធ្លាប់ជួបប្រទះ”។

មេរោគអេបូឡាកំពុងមានការរីករាលដាលយ៉ាងឆាប់រហ័សនៅអាហ្វ្រិកខាងលិច។ ៣ សប្ដាហ៍ចុងក្រោយ ដោយគិតត្រឹមថ្ងៃពុធម្សិលមិញនេះ អ្នកស្លាប់ដោយមេរោគមរណៈមួយនេះមានរហូតដល់ទៅ ៤០ ភាគរយ នៃចំនួនអ្នកស្លាប់ទាំងអស់៕