អៃយ៉ា! មានកន្លែងផ្ដល់កម្លាំងចិត្ត និងការតម្រង់ទិសដៅ ដល់អ្នកធ្លាក់បាក់ឌុប ដោយឥតគិតថ្លៃផង

អៃយ៉ា! មានកន្លែងផ្ដល់កម្លាំងចិត្ត និងការតម្រង់ទិសដៅ ដល់អ្នកធ្លាក់បាក់ឌុប ដោយឥតគិតថ្លៃផង

វិទ្យាស្ថានមួយ ដែលមានឈ្មោះថា វិទ្យាស្ថានសិក្សាដើម្បីជោគជ័យបានប្រកាសផ្ដល់ការប្រឹក្សាផ្តល់កម្លាំងចិត្តដល់បេក្ខជន ដែលប្រលងធ្លាក់បាក់ឌុប ខណៈការប្រលងឆ្នាំនេះមានបេក្ខជនប្រមាណ ៧៥% ភាគរយប៉ុណ្ណោះប្រលងជាប់។ យ៉ាងណាក៏ដោយអ្នកជាប់បាក់ឌុបក៏ត្រូវបានលើកទឹកចិត្តឲ្យចូលរួម ក្នុងវគ្គទម្រង់ទិសនេះផងដែរ។

ថ្លែងនៅក្នុងសន្និសីទសារព័ត៌មាននៅវិទ្យាស្ថានសហប្រតិបត្តិការកម្ពុជា-ជប៉ុនកាលពីព្រឹកមិញ លោក ឃឹម សុខហេង នាយកវិទ្យាស្ថានសិក្សាដើម្បីជោគជ័យបានមានប្រសាសន៍ថា មានពីរចំណុចសំខាន់ៗ ដែលតម្រូវឲ្យរៀបចំកម្មវិធីនេះឡើង ទី១ លទ្ធផលនៃអ្នកមិនទាន់ជាប់បាក់ឌុបមានចំនួនច្រើន សន្ធឹកសន្ធាប់ ជាហេតុធ្វើឲ្យអ្នកទាំងនោះមួយចំនួនធំ រងផលប៉ះពាល់ដល់កត្តាផ្លូវចិត្ត ហើយការបាក់ទឹកចិត្តនេះនឹងអាចជំរុញឲ្យពួកគាត់ រកមិនឃើញនូវភាពខ្លាំង ឬសក្ដានុពល ក្នុងខ្លួនរបស់ពួកគាត់។ ចំណុចទី២ ទាំងអ្នកជាប់ និងអ្នកមិនទាន់ជាប់ អាចនឹងវង្វេងទិសដៅឬ មិនដឹងថាខ្លួនគាត់ត្រូវធ្វើយ៉ាងណា ត្រូវបន្តរៀនថ្នាក់បរិញ្ញាបត្រ ឬជំនាញ ឬត្រូវធ្វើការងារដើម្បីជីវភាព រួចមកបន្តការសិក្សាជាបន្តបន្ទាប់។ “ដូច្នេះសន្និសីទនេះ នឹងជូនជាព័ត៌មាន ក៏ដូចជាតម្រង់ឲ្យពួកគាត់ មើលឃើញខ្លួនគាត់ឲ្យកាន់តែប្រសើរឡើង”។

Under-the-rain8

លោក គឹម អឿន នាយកនៃមជ្ឈមណ្ឌលសហប្រតិបត្តិការកម្ពុជា-ជប៉ុន បានចាត់ទុកការផ្តល់ការប្រឹក្សានេះ គឺមានសារសំខាន់បំផុតទាំងអ្នកជាប់បាក់ឌុប និងអ្នកធ្លាក់បាក់ឌុប។ មានការយល់ច្រឡំ ដ៏ធំមួយ ដែលថា ការធ្លាក់បាក់ឌុប ធ្វើឲ្យគ្រួសារបាក់មុខមាត់។ ការជាប់ឬធ្លាក់បាក់ឌុបមិនមែនជារនាំង ធ្វើឲ្យយើងមិនអាចបន្តការសិក្សាបាននោះទេ។ លោកថា យុវជនអាចរៀនបរិញ្ញាបត្ររង ឬចាប់យកជំនាញបច្ចេកទេសដែលបានផ្តល់នូវប្រាក់ចំណូល ឬការងារល្អជាងអ្នកជាប់បាក់ឌុប ឬចប់សញ្ញាបត្របរិញ្ញាបត្រក៏ថាបាន។ “តម្រូវការអ្នកបច្ចេកទេស បច្ចុប្បន្នមានការកើនឡើងជាខ្លាំង។ ទីផ្សារការងារ បច្ចុប្បន្នធំណាស់”។

ទន្ទឹមគ្នាដែរ លោក គុយ វ៉ាត ប្រធានក្រុមប្រឹក្សាភិបាលនៃក្លឹបអ្នកវិនិយោគទុនកម្ពុជាបានថ្លែងថានេះ គឺជាសញ្ញាល្អមួយ ដែលវិស័យអប់រំ ក្នុងប្រទេសត្រូវបានកែលំអឲ្យកាន់តែមានភាពល្អប្រសើរ ជាពិសេសកាន់តែមានតម្លៃចំពោះអ្នកជាប់បាក់ឌុបបាននិទ្ទេសល្អ។ ប៉ុន្តែចំពោះអ្នកមិនទាន់ជាប់បាក់ឌុបកុំអស់សង្ឃឹមឲ្យសោះ ព្រោះទីផ្សារការងារកម្ពុជាបច្ចុប្បន្នមិនដូចប៉ុន្មានឆ្នាំកន្លងមកឡើយ។ លោកបានបន្ថែមថា ស្ថានភាពទីផ្សារការងារបច្ចុប្បន្ន ទោះអ្នកគ្មានជំនាញក៏អាចរកការងារបានធ្វើដែរ។ “ដូចនេះឪពុក-ម្ដាយ មិត្តភ័ក្ដិមានតួនាទីសំខាន់ណាស់ ក្នុងការលើកទឹកចិត្តអ្នកទាំងនោះឲ្យខិតខំប្រឹងប្រែង។ កុំបាក់ទឹកចិត្តឲ្យសោះ”។

បេក្ខជន-បេក្ខនារីអាចអញ្ជើញមកទីតាំងវិទ្យាស្ថាន នៅក្បែរវិទ្យាល័យបាក់ទូក ឬអាចទាក់ទងទូរសព្ទលេខ ០១៦ ៥០០ ៩៩០,០១០ ៩១០ ៧៧៧ និងមាន៤ ខ្សែផេ្សងទៀត ដែលអាចទាក់ទងរាល់ម៉ោងធ្វើការ៕

ប្រភព: sabay

មុន បន្ទាប់

មតិយោបល់