មួយសប្ដាហ៍ក្រោយសង្រ្គាមនៅកាហ្សាបានបញ្ចប់

មួយសប្ដាហ៍ក្រោយសង្រ្គាមនៅកាហ្សាបានបញ្ចប់

gaza

រូបភាពកុមារម្នាក់អង្គុយលើគំនរបាក់បែក ដែលជាអតីតផ្ទះរបស់ខ្លួនខាងលើនេះ បានបង្ហាញពីជីវិតក្រោយសង្រ្គាមរវាងកាហ្សា និងអ៊ីស្រាអែលបានបញ្ចប់ទៅ។

កងឧទ្ទាម ហាម៉ាស់ និងអ៊ីស្រាអែលបានព្រមព្រៀងគ្នាបញ្ចប់សង្រ្គាមកាលពីថ្ងៃព្រហស្បតិ៍សប្ដាហ៍មុន។ ក្នុងរយៈពេលមួយសប្ដាហ៍ក្រោយបទឈប់បាញ់នោះ ប្រជាជននៅតំបន់កាហ្សាមួយចំនួនបានវិលទៅកាន់លំនៅដ្ឋានរបស់ខ្លួនវិញខ្លះហើយ។

សង្រ្គាមរយៈពេល៥០ថ្ងៃនេះ បានសម្លាប់ជីវិតប្រជាជនប៉ាឡេស្ទីន ២១០០នាក់ ដែលក្នុងនោះ៣ភាគ៤ ជាជនស៊ីវិល ខណៈកុមារដែលស្លាប់មានយ៉ាងហោចណាស់ ៤៩៤នាក់។ នេះបើយោងតាមការប៉ាន់ស្មានរបស់ប៉ាឡេស្ទីន និងអង្គការសហប្រជាជាតិ។ យ៉ាងណាក្ដី បើតាមការប៉ាន់ស្មានរបស់អ៊ីស្រាអែលវិញបានឲ្យដឹងថា ក្នុងចំណោមអ្នកស្លាប់ទាំងនោះ មានយ៉ាងហោចណាស់ក៏ពាក់កណ្ដាលដែរ ជាយោធា មិនមែនជនស៊ីវិលនោះទេ។

ចំណែកខាងអ៊ីស្រាអែលវិញ មានទាហាន៦៦នាក់ និងជនស៊ីវិល៣នាក់បានស្លាប់ ក្នុងនោះមានជនជាតិថៃម្នាក់ផងដែរ។ ពួកហាម៉ាស់ និងកងយោធាផ្សេងទៀតរបស់កាហ្សា បានបាញ់គ្រាប់រ៉ុកកែត ៤៥៩១គ្រាប់ទៅលើអ៊ីស្រាអែល (ភាគច្រើននៅភាគខាងត្បូង) ខណៈអ៊ីស្រាអែលបានវាយប្រហារតាមផ្លូវអាកាសជាង៥០០០លើកទៅលើតំបន់កាហ្សាផងដែរ។

អស់ផ្ទះ សល់ត្រឹមសាឡុងអង្គុយជជែកគ្នាលើក្រោមពន្លឺភ្លើង

ក្នុងរយៈពេលនៃសង្រ្គាមនោះដែរ អ៊ីស្រាអែលបានបំផ្លាញផ្ទះរាប់ពាន់ខ្នងនៅតំបន់កាហ្សា ដែលធ្វើឲ្យមនុស្សប្រហែល២៥ម៉ឺននាក់ត្រូវជម្លៀសទៅកាន់ជំរំ (សាលា) របស់ UN ជាង១០០កន្លែង។ ដោយសារតែមនុស្សរាប់ម៉ឺននាក់នៅមិនទាន់មានជម្រកនៅឡើយ មន្រ្ដីអប់រំបានពន្យារបវេសនកាលថ្មីទៅសប្ដាហ៍ក្រោយ។ ការពន្យារពេលនេះ ក៏ដោយសារតែសាលានៅកាហ្សាយ៉ាងហោចណាស់ ២២៣កន្លែង ត្រូវបានបំផ្លាញដោយគ្រាប់ផ្លោងរបស់អ៊ីស្រាអែល។ ឆ្លើយតបចំពោះបញ្ហានោះ អ៊ីស្រាអែលបានចោទប្រកាន់ពួកហាម៉ាស់ថាបានប្រើអគាររបស់ជនស៊ីវិល ដូចជាសាលារៀនជាដើមនោះ ក្នុងគោលបំណងយោធា។

ទោះបីជាកិច្ចព្រមព្រៀងបញ្ចប់សង្រ្គាមត្រូវបានធ្វើឡើងដោយជោគជ័យក៏ពិតមែន ក៏ភាគីទាំងពីរនៅមានបញ្ហាសំខាន់ៗមួយចំនួនទៀតដែលមិនទាន់ដោះស្រាយចេញនៅឡើយ ដូចជាបញ្ហាបិទផ្លូវជើងហោះហើរ និងបញ្ហាប្រគល់សាកសពទាហានដែលស្លាប់។ ដំណើរការចរចាលើបញ្ហាទាំងនោះ រំពឹងថានឹងចាប់ផ្ដើមនៅចុងខែនេះ នៅប្រទេសអេហ្សីប៕