លោកយាយចាស់ជាងគេលើលោក វ័យ១២៧ឆ្នាំ ប្រាប់ថាសូកូឡាធ្វើឲ្យអាយុវែង

លោកយាយចាស់ជាងគេលើលោក វ័យ១២៧ឆ្នាំ ប្រាប់ថាសូកូឡាធ្វើឲ្យអាយុវែង

លោកយាយជនជាតិម៉ិកស៊ីកូ វ័យ ១២៧ឆ្នាំម្នាក់ ដែលត្រូវបានគេចាត់ទុកថាជាមនុស្សចាស់ជាងគេបំផុតលើលោក បានអះអាងថាសូកូឡា គឺជាមូលហេតុដែលជួយឲ្យលោកយាយមានអាយុវែង។ លោកយាយ Leandra Becerra Lumbreras កើតនៅថ្ងៃទី ៣១ ខែសីហា ឆ្នាំ១៨៨៧ មានន័យថានៅក្នុងសង្គ្រាមលោកទី១ លោកយាយមានអាយុ ២៧ ឆ្នាំទៅហើយ។

old

លោកយាយ Lumbreras បាននិយាយថាសូកូឡា គឺជាកូនសោដែលធ្វើឲ្យលោកយាយមានអាយុដល់ទៅ ១២៧ឆ្នាំ។ លោកយាយបានបន្ថែមទៀតថា “ការងារ” ក៏ជាអាថ៌កំបាំងមួយដែលធ្វើឲ្យរស់បានដល់ពេលនេះដែរ។

ចំណែកចៅស្រី វ័យ៤៣ឆ្នាំរបស់លោកយាយ ឈ្មោះ Miriam Alvear ក៏បាននិយាយឲ្យដឹងដែរថា “លោកយាយគឺជាមនុស្សតស៊ូនឹងការងារ។ គាត់នៅតែដេរប៉ាក់ និងត្បាញរហូតដល់អាយុ ១២៥ឆ្នាំ ទើបឈប់។ គាត់មិនដែលសម្រាកពីការងារឡើយ”។

លោកយាយ Lumbreras គឺជាវីរនារីម្នាក់ ដែលចូលរួមវាយប្រយុទ្ធក្នុងការធ្វើបដិវត្តប្រទេសម៉ិកស៊ីកូពីឆ្នាំ ១៩១០ ដល់ ១៩១៧។ ពេលនោះ លោកយាយបានធ្វើជាមេដឹកនាំ “Adelitas” ជាក្រុមស្ត្រីដែលទៅធ្វើសង្គ្រាមក្នុងសមរភូមិជាមួយប្ដី។

old1

ជីវិតរស់នៅយូរអង្វែងបែបនេះ ទុក្ខសោកក៏មានច្រើនដែរ។ ក្នុងរយៈពេល ១២៧ឆ្នាំមកនេះ លោកយាយបានបាត់បង់កូនទាំង ៥នាក់ និងចៅប្រហែល ២០នាក់។ កូនដែលស្លាប់ក្រោយគេ គឺនៅឆ្នាំ ២០១៣ ក្នុងវ័យ ៩០ឆ្នាំ។ ទោះយ៉ាងណា លោកយាយនៅមានចៅទួត ៧៣នាក់ និងចៅលួត ៥៥នាក់ទៀត។ ពេលនេះ អាជ្ញាធរម៉ិកស៊ីកូកំពុងធ្វើសំបុត្រកំណើតថ្មីឲ្យលោកយាយ ក្រោយពេលសំបុត្រកំណើតចាស់បានបាត់បង់កាលពី ៤០ឆ្នាំមុន៕

old2