ដល់ពេលតារាខ្មែរឡើងធ្វើតួឯកនៅថៃហើយតើ…!!!

ដល់ពេលតារាខ្មែរឡើងធ្វើតួឯកនៅថៃហើយតើ…!!!

បន្ទាប់ពីសិល្បករខ្មែរមួយក្រុម ត្រូវទូរទស្សន៍ថៃចុះមកសម្ភាសន៍ដល់ស្រុកកាលពីប៉ុន្មានខែមុន ពេលនេះ ស្រាប់តែសិល្បការិនីខ្មែរយើងម្នាក់ គឺកញ្ញា ថន លក្ខិណា ត្រូវបានគេជ្រើសរើសឲ្យធ្វើជាតួឯកស្រីក្នុងខ្សែភាពយន្តខ្នាតធំមួយរបស់ថៃ មានចំណងជើងថា “ទីក្រុងខ្មោច”។ ថន លក្ខិណា

ភាពយន្តនេះ ស្ថិតក្រោមកិច្ចសហការផលិតរវាងភាគីថៃ និងម៉ាឡេស៊ីជាមួយទុនផលិតរាប់ម៉ឺនដុល្លារឯណោះ ក្នុងនោះ ថែមទាំងមានការចូលរួមសម្ដែងដោយតារាល្បីៗមកពីប្រទេសក្នុងតំបន់អាស៊ានមួយចំនួនផង។ “រឿងនេះ ទៅថតនៅច្រើនប្រទេសណាស់បង ដូចជាប្រទេសថៃ ខ្មែរ ឡាវ និងមីយ៉ាន់ម៉ា ហើយតាមប្រទេសនីមួយ គេមានតារាប្រចាំប្រទេសគេរៀងៗខ្លួន”។ ថន លក្ខិណា អះអាង។

សម្រាប់កម្ពុជា គឺមានកញ្ញា ថន លក្ខិណា សម្ដែងជាតួឯកស្រីតែម្ដងឈ្មោះ “Rose” ជាគូជាមួយនឹងតួឯកប្រុសជនជាតិថៃឈ្មោះ ឈូឆាត។លក្ខិណា ប្រាប់ថានេះ គឺជាលើកដំបូងដែលកញ្ញាបានសម្ដែងក្នុងភាពយន្តបរទេស ។ យ៉ាងណា ពិធីការិនីទូរទស្សន៍ CTN រូបនេះ មិនច្បាស់ទេអំពីលក្ខខណ្ឌដែលកញ្ញាត្រូវបានជ្រើសរើស រួមទាំងសាច់រឿងផង។

“ខ្ញុំអត់ច្បាស់ទេ ដឹងតែនិយាយពីរឿងខ្មោច គឺតាមប្រទេសនីមួយៗហ្នឹងមានរឿងខ្មោចផ្សេងៗគ្នា។ ដោយឡែកចំពោះការជ្រើសរើសខ្ញុំសម្ដែងវិញ ប្រហែលដោយសារខ្ញុំចេះភាសាថៃ ព្រោះរឿងនេះនិយាយថៃសុទ្ធតែម្តង”។

“ទីក្រុងខ្មោច” ទើបបានបញ្ចប់ការថតរបស់ខ្លួននៅខេត្តសៀមរាបកាលពីថ្មីៗនេះ បន្ទាប់ពីបានបញ្ចប់នៅប្រទេសមួយចំនួនខាងលើរួចរាល់។ ភាពយន្តខ្នាតធំនេះ គ្រោងបញ្ចាំងនៅថៃនាអំឡុងខែវិច្ឆិកាខាងមុខ មុនយកមកបញ្ចាំងនៅខ្មែរ។ “នៅថៃប្រហែលជាដាក់បញ្ចាំងនៅថៃក្នុងខែវិច្ឆិកា ហើយពេលសម្ពោធនោះ ខ្ញុំត្រូវទៅដែរ ប៉ុន្តែនៅខ្មែរយើង អត់ដឹងពេលណាឲ្យច្បាស់ទេ”។ លក្ខិណា បញ្ជាក់។

លក្ខិណា នៅប្រាប់ជាចុងក្រោយថា ដើមឡើយរឿងនេះមានចំណងជើងថា “ទីក្រុងខ្មោច” ប៉ុន្តែពេលដាក់បញ្ចាំង ប្រហែលជាត្រូវដូរចំណងជើងវិញ យ៉ាងណាកញ្ញាមិនទាន់ដឹងថា គេដូរដាក់យ៉ាងណាវិញទេ។ ក្នុងរឿង “ទីក្រុងខ្មោច” លក្ខិណា សម្ដែងជាតួបីនាក់ខុសៗគ្នា គឺតួនាង “រ៉ូស” ជាស្រីស្អាតនៅ Mini Bar តួខ្មោច និងតួជាអ្នកលើកកាហ្វេនៅសណ្ឋាគារ។ ដូច្នេះហើយ កញ្ញាសង្ឃឹមថា ប្រជាប្រិយភាពនាងនឹងកើនឡើងខ្ពស់បន្ទាប់ពីរឿងនេះ បានដាក់បញ្ចាំងទាំងក្នុងនិងក្រៅស្រុក។

ថន លក្ខិណា និងតួប្រុសជនជាតិថៃឈ្មោះ ឈូឆាត និងឈ្មោះ “អំ” ក្នុងរឿង “ទីក្រុងខ្មោច”

ថន លក្ខិណា គឺជាពិធីការិនីទូរទស្សន៍ CTN ដោយបច្ចុប្បន្នកំពុងកាន់កម្មវិធីដល់ទៅបីរួមមាន កម្មវិធី “សំណើចតាមភូមិ” “រាត្រីសំណព្វចិត្ត” និងកម្មវិធី “ផ្ទះលោកតា”។ ក្រៅពីអាជីពជាពិធីការិនី លក្ខិណា ជាតារាម៉ូដែល និងជាតារាសម្ដែងផង ដោយបច្ចុប្បន្នកំពុងជាប់សម្ដែងក្នុងរឿង “គំនុំអតីតជាតិ” ដែលបាន និងកំពុងចាក់ផ្សាយលើកញ្ចក់ទូរទស្សន៍ CTN៕

ប្រភព:sabay

មុន បន្ទាប់

មតិយោបល់