កែវ វាសនា ខែភ្លៀង១យប់ទាថ្លៃ ៨០០ ទៅ ១០០០ ដុល្លារ

កែវ វាសនា ខែភ្លៀង១យប់ទាថ្លៃ ៨០០ ទៅ ១០០០ ដុល្លារ

ចូលដល់រដូវវស្សាមានភ្លៀងផ្គរយ៉ាងណាក្ដី មិនបានធ្វើឲ្យទីផ្សារសិល្បៈរបស់ កែវ វាសនា ថមថយនោះទេ ខណៈរូបគេត្រូវបានភ្នាក់ងារអ្នករៀបចំកម្មវិធីប្រគំតន្ត្រីតាមបណ្ដាខេត្តនានា ហៅទៅច្រៀងជារឿយៗស្ទើររកពេលសម្រាកគ្មាន។

វាសនា ប្រាប់ថា៖ “ទន្ទឹមចម្រៀងនោះ យើងក៏ត្រូវមានទំនាក់ទំនងល្អជាមួយពូកគាត់ដែរ ១យប់ ខ្ញុំយកថ្លៃ ៨០០ ដុល្លារ ទៅ ១០០០ ដុល្លារអីហ្នឹង ជួនកាលចុះជាងហ្នឹងទៀត បើអ្នកមើលតិច…(ស)”។

វាសនា ប្រាប់ Sabay បន្ដថា ភាគច្រើន នៃកម្មវិធីទាំងនោះ មិនបានបើកឲ្យចូលទស្សនា ដោយសេរីនោះទេ ព្រោះរៀបចំឡើងជាលក្ខណៈឯកជន និង តម្រូវឲ្យទិញសំបុត្រចូលទស្សនា។ ប្រការនេះធ្វើឲ្យអ្នកចូលរួមទស្សនាមិនទៀងទាត់ ជួនកាលអាចមានអ្នកចូលទស្សនាតិចតួច និង ជួនកាលទៀតអាចមានមនុស្សចូលមើលច្រើន អាស្រ័យលើយុវវ័យជាអ្នកគាំទ្រតាមតំបន់នីមួយៗ។ នេះជាដើមចមនាំឲ្យតម្លៃខ្លួនរបស់គេត្រូវប្រែប្រួលទៅតាមហ្នឹង។ វាសនា និយាយបន្ថែម។

ម្យ៉ាងទៀត ម្ចាស់បទ “នឹកអូនឡើងគ្រុន” ខាងលើបន្ថែមថា រូបគេមានទំនាក់ទំនងល្អជាមួយភ្នាក់ងាររៀបចំកម្មវិធីប្រគំតន្ត្រីប្រមាណ ១០ ឆាកផ្សេងគ្នាឯណោះ។ វាសនា អះអាងថា ស្ប៉នស័រទាំងនោះ នឹងធ្វើការទាក់ទងដោយផ្ទាល់ទៅកាន់រូបគេ ប្រសិនបើចង់ឲ្យឡើងច្រៀងក្នុងការប្រគំតន្ត្រីណាមួយ។

ងាកមកការងារក្នុងផលិតកម្មសាន់ដេវិញ វាសនា ឲ្យដឹងថា ភាគីផលិតកម្មកំពុងរង់ចាំរូបគេ ដើម្បីចេញអាល់ប៊ុមថ្មីរួមគ្នាជាមួយតារាចម្រៀងជួរមុខនៅក្នុងផលិតកម្មរួមទ្រនំ ប៉ុន្តែ ក៏ត្រូវសុំការយោគយល់ ខណៈខ្លួនមានការមមាញឹកនៅតាមខេត្តមិនទាន់ដកខ្លួនរួចនៅឡើយទេ។ វាសនា នឹងត្រៀមខ្លួន សម្រាប់ការចេញបទចម្រៀងថ្មីៗ ក្នុងពេលឆាប់ៗ ខាងមុខនេះ។

វាសនា បញ្ជាក់ថា៖ “បើខ្ញុំគិតតែពីដើរច្រៀងឲ្យឯកជន ហើយមិនច្រៀងឲ្យផលិតកម្ម គឺ មិនសមនោះទេ។ ម្យ៉ាងទៀត ប្រសិនបើគ្មានបទថ្មីចេញទេ ក៏គ្មាននរណាគេហៅទៅច្រៀងដែរ”៕

ប្រភព:sabay

មុន បន្ទាប់

មតិយោបល់