២០១៥ឆ្នាំរបស់ឆាយ វីរៈយុទ្ធ និង ខេម ឡើងដល់កំពូល?

២០១៥ឆ្នាំរបស់ឆាយ វីរៈយុទ្ធ និង ខេម ឡើងដល់កំពូល?

ឆ្លងកាត់សមរភូមិសិល្បៈច្រើនឆ្នាំរៀងខ្លួន ឥឡូវនេះលោក ឆាយ វីរៈយុទ្ធ ដែលឈរជើងនៅសាន់ដេ និងតារាចម្រៀងស្អកលោក ខេម នៅផលិតកម្ម ថោន ត្រូវបានគេលើកតម្កើងថា ជាតារាស្ដេចត្រាញ់ក្នុងទ្រនំរៀងខ្លួន បើទោះទ្រនំនីមួយៗមានតារាចម្រៀងមានសក្ដានុពលរៀងខ្លួនក៏ដោយ។

ការលើកឡើងនេះបន្ទាប់ពីតារាចម្រៀងទាំងពីរបានបញ្ចេញបទរៀងខ្លួនចាក់ដល់បេះដូងអ្នកស្ដាប់ ជាបន្តបន្ទាប់រយៈកាលចុងក្រោយនេះ ខណៈតារាជើងខ្លាំងផ្សេងៗទៀត ស្ថិតនៅក្នុងសភាពស្ងប់ស្ងាត់។ ឆាយ វីរៈយុទ្ធ

លោក ឆាយ វីរៈយុទ្ធ មានបទ “បងពីមុនឆ្កួតបាត់ហើយ” “នឹកអូនបងឆ្អែតបាយ” “ចាំគេចេះក្បត់អូន” និងបទ “មនុស្សល្អរបស់បងអើយ” ជាដើម។ ឯលោក ខេម មានបទ “ថ្ងៃស្អែកអូនការ” “ខ្ញុំខ្លាចហើយលុយ” និងបទ “បែកពីអូនបងមានលុយចាយជាងមុន” ជាដើម។

លោក ច័ន្ទ សុវិទ្យា វ័យ ២០ និស្សិតអក្សរសាស្ត្រអង់គ្លេសឆ្នាំទី២ ថ្លែងថា “បើថាខ្ញុំជា Fan បង យុទ្ធ ក៏ថាបាន ប៉ុន្តែកាលពីមុនខ្ញុំក៏ជាអ្នកស្ដាប់បទបងសុវត្ថិ ដែរតើ។ សំឡេងគាត់បើច្រៀងបទអារបៀបត្អូញត្អែរ គឺលេខ១តាហ្មងបង…ហើយបទគាត់ចុងក្រោយៗ គឺបែបហ្នឹង…គាត់អាចឡើងជាងហ្នឹងទៀតបើតាមខ្ញុំគិត”។

“ខ្ញុំចូលចិត្តសំឡេងរបស់គាត់គាត់ណាស់ គាត់ពិតជាច្រៀងពីរោះមែនទែន!” ឆ្លើយតបយ៉ាងខ្លីពីកញ្ញា រស្មី និស្សិតនៅវិទ្យាស្ថានវ៉ាន់ដាគណនេយ្យ។

វិលមក សត្យា អ្នកគាំទ្រលោក ខេម វិញថ្លែងថា “អ្នកណាមិនដឹងទេ តែខ្ញុំដឹងតែបង ខេម ហើយ…និយាយការពិត ពីមុនៗខ្ញុំក៏អត់សូវស្ដាប់បទគាត់ដែរ ប៉ុន្តែមួយរយៈចុងក្រោយៗហ្នឹង បទគាត់ពីរោះៗដល់កហើយ ទាំងខ្ញុំទាំងមិត្តភ័ក្ដិខ្ញុំស្ដាប់តែទាំងអស់គ្នាហ្នឹង។ ក្នុងចំណោមយុវវ័យ ខ្ញុំហ៊ានធានា ថាគាត់ជាប់លេខ១ហ្មង!”។

អ្នកគាំទ្រម្នាក់ទៀតរបស់លោក ខេម គឺលោក បញ្ញារិទ្ធ ថ្លែងថា “អ្វីដែលខ្ញុំពេញចិត្តគឺសំឡេង គាត់ស្អកមែន តែស្អកពីរោះយកតែមែនទែន បទញាក់មិនដឹងទេ តែបើមនោសញ្ចេតនាស្នេហាត្អូញត្អែរ សុំចិត្តហើយ! បើយើងពូកែដាក់មនោសញ្ចេតនាតាមបទចម្រៀងទៀតណា៎ ស្ដាប់ហើយចង់យំ ពិសេសបទ “ថ្ងៃស្អែកអូនការ” ជាដើម”។

ពាក់ព័ន្ធនឹងតារាចម្រៀងទាំងពីរដួងនេះ អ្នកជំនាញខាងតន្ត្រីម្នាក់បានពោលសរសើរដូចគ្នា។ លោក ថា “ឆាយ វីរៈយុទ្ធ គាត់មានសំឡេងល្អ ហើយចេះថែរក្សាសំឡេង មួយទៀត គាត់ពូកែលើកដាក់សំឡេង។ យោងតាមស្ថានភាពនេះ ខ្ញុំហ៊ាននិយាយថា គាត់អាចឈានទៅឈរលេខ១បាន”។

ពាក់ព័ន្ធនឹងលោក ខេម សាស្ត្រាចារ្យតន្ត្រីរូបនេះ ថ្លែងដែរថា ” ខេម គាត់ក៏មានសំឡេងល្អមួយបែបរបស់គាត់ វាដូចជាកាលពីសម័យមុនមានលោក ហួរ ឡាវី អីចឹង តែឥឡូវមានគាត់ គេហៅថា សំឡេងស្អកពីរោះហ្នឹងឯង!”។

ក្រៅតែពីទទួលស្គាល់លើសក្ដានុពលសំឡេង លោក ឆាយ វីរៈយុទ្ធ និងលោក ខេម នៅទទួលបានការកោតសរសើរលើចំណុចផ្សេងទៀតមានដូចជាអត្តចរិត និងការស្លៀកពាក់ជាដើម។

“បង ឆាយ វីរយៈយុទ្ធ ខ្ញុំស្រឡាញ់ការរៀបចំខ្លួន និងចរិតឫកពារគាត់ មើលទៅថ្លៃថ្នូរ តារាខ្លះល្បីដែរ ប៉ុន្តែធ្វើខ្លួនដូចឈ្លើយភ្លាវទៅវិញ។ ឯបង ខេម ការស្លៀកពាក់ ឡូយម្យ៉ាងបែបយុវវ័យ។ ខ្ញុំធ្លាប់ទៅមើលគាត់ច្រៀងនៅអប្សរាដែរតើ គាត់គួរឲ្យចូលចិត្តណាស់!”។ មិនា បុគ្គលិកផ្នែកលក់ក្រុមហ៊ុនឯកជនមួយ៕

ប្រភព: sabay

មុន បន្ទាប់

មតិយោបល់