ខេមរៈ ស្រីពៅ បងប្រុសបង្កើតចេញមុខការពារ

ខេមរៈ ស្រីពៅ បងប្រុសបង្កើតចេញមុខការពារ

ភ្នំពេញៈ ខណៈតារាចម្រៀងស្រីៗដែលចូលមកជ្រកនៅទ្រនំសាន់ដេកាន់តែច្រើននោះ ស្រាប់តែតារាចម្រៀង កញ្ញា ខេមរៈ ស្រីពៅ ដែលធ្លាប់តែមានសន្ទុះលោតខ្លាំង អមប្រជាប្រិយភាពបងប្រុស លោក ខេមរៈ សេរីមន្ត នោះ បែរជាស្ងាត់ដូចចោរលួចសេះទៅវិញ។
ការអាក់ខានសកម្មភាពសិល្បៈ មិនមានបទថ្មីចេញលក់នៅលើទីផ្សារនោះ មិនមែនទើបតែកើតមាននៅពេលថ្មីៗចុងក្រោយនេះទេ ពោលគឺត្រូវបានគេកត់សម្គាល់ឃើញកើតមានចំពោះតារាចម្រៀងប្អូនស្រីកវីនិពន្ធលោក ខេមរៈ ភារុណ និង លោក ខេមរៈ សេរីមន្ត តាំងពីពាក់កណ្តាលឆ្នាំ២០១៣ ម្ល៉េះ ដែលភ្លាមៗនោះក៏មានលេចដំណឹងដ៏រសើបថា តារាចម្រៀងរាងខ្ពស់ស្រឡះនាង ខេមរៈ ស្រីពៅ បានភ្ជាប់ពាក្យស្ងាត់ៗជាមួយបុរសអាណិកជនខ្មែរ រស់នៅសហរដ្ឋអាមេរិក និងត្រូវបានគូដណ្តឹងសំណូមពរឲ្យ ស្រីពៅ លាឈប់ពីសិល្បៈ។ ប៉ុន្តែដំណឹងដ៏រសើបនេះ មិនត្រូវបានបងប្រុសទាំងពីរទទួលស្គាល់នោះទេ ហើយពួកគេថែមទាំងស្តីបន្ទោសឲ្យអ្នកដែលប្រឌិតដំណឹងនោះថា ជាចេតនាប្រឌិតដើម្បីបង្កាច់បង្ខូចកិត្តិយសនាងទៀតផង។
យ៉ាងណាពេលវេលាមកទល់នឹងពេលនេះ រំកិលផុតជិតមួយឆ្នាំហើយ ហើយនៅក្នុងទ្រនំសាន់ដេ តារាចម្រៀងស្រីៗ ដែលជាអ្នកចំណូលថ្មី ពួកគេបែរជាមានបទចម្រៀងចេញលក់នៅលើទីផ្សារជាហូរហែ ចំណែកឯ ស្រីពៅ ដែលជាតារាចម្រៀងបង្គោលដ៏រឹងមាំម្នាក់ដែរនៅសាន់ដេ និងមានបងប្រុសជាអ្នកនិពន្ធឆ្នើមស្រាប់នោះ បែរជានៅតែមិនមានបទចម្រៀងថ្មីចេញ ដែលធ្វើឲ្យមហាជនរឹតតែមានការងឿងឆ្ងល់ និងនាំគ្នាគិតដល់ដំណឹងដែលល្បីថាបានភ្ជាប់ពាក្យជាមួយបុរសអាណិកជនជាការពិត។
តបនូវភាពស្ងប់ស្ងាត់នោះ ក៏មានប្រភពពីបុគ្គលិករបស់ផលិតកម្មសាន់ដេបានបង្ហើបថា ខេមរៈ ស្រីពៅ ហាក់ព្រងើយកន្តើយមិនរវល់ យកចិត្តទុកដាក់នឹងការច្រៀង ឬហ្វឹកហាត់បញ្ចេញក្បាច់រាំថ្មីៗដើម្បីប្រកួតប្រជែងទីផ្សារចម្រៀងឡើយ។
ប្រភពដដែលនោះ បានឲ្យដឹងទៀតថា «ផ្ទុយទៅវិញ នាងបែរជាសម្ងំពួនលាក់អាត្មា ហើយបើតាមសង្កេត បងប្រុសរបស់នាង លោក ខេមរៈ ភារុណ ដែលជាអ្នកនិពន្ធនោះ ក៏មិនអើពើនឹងនិពន្ធបទចម្រៀងឲ្យប្អូនស្រីដែរ។ តែឮគេចង់ឲ្យប្អូនស្រីគិតរឿងសិក្សាជាការសំខាន់»។
បំភ្លឺជុំវិញដំណឹងដ៏រសើបនេះ ខេមរៈ ស្រីពៅ មិនអាចទាក់ទងបានទេ។ ប៉ុន្តែបងប្រុសតារាចម្រៀងរូបនេះ និងជាអ្នកនិពន្ធប្រចាំនៅផលិតកម្មសាន់ដេដ៏ល្បីផងនោះ បានបដិសេធដំណឹងភ្ជាប់ពាក្យ និងការដកខ្លួនពីសិល្បៈដោយ ថា ជាប់ដៃការសិក្សា។
លោក ភារុណ ប្រាប់ថា៖ «ដោយពេលនេះ ផលិតកម្មមានតារាចម្រៀងច្រើន ពិតជាមានភាពយឺតយ៉ាវបន្តិចមែនក្នុងការចេញបទសម្រាប់តារាចម្រៀង ប៉ុន្តែភាពយឺតយ៉ាវនោះមិនមែនតែ ស្រីពៅ ប្អូនខ្ញុំទេ មានគ្រប់តែតារាចម្រៀង»។
លោកបានបន្តថា៖ «ស្រីពៅ នៅមួយខែមុននេះ ទើបតែចេញវ៉ុលពិសេសជាមួយ សេរីមន្ត ហើយផលិតកម្មក៏សម្រិតសម្រាំងបទថ្មីៗ និងល្អៗ សម្រាប់ចេញក្នុងវ៉ុលបុណ្យភ្ជុំ និងសម្រាប់ឱកាសនៃពិធីបុណ្យចូលឆ្នាំផងដែរ»៕ ប្រភព ៖ ភ្នំពេញប៉ុស្តិ៍
20140827_20a-small